Kaavpugpirrâsist sämikielâ já sämmilâš kulttuur nanodem ij lah oovtâkiärdánis äšši. Tondiet vaanhimeh Liisa já Tomi Sonkamuotka halijdáin, ete sunnuu pärni jotá Oulu Lintulampi škoovlâ sämi- já suomâkielâ ovtâskâsluokkaast.
Suomâ-sämiluokka algâttij 2023 neelji ive piiloothavváin. Siämmáá ive Sonkamuotkai pärni algâttij vuossâmuu luoka škoovlâst. Tääl pärni jotá kuálmád luoka.
Haahâ nohá keessiv 2027 já vaanhimeh láá huolâst juátkoo-uv párnái sämikielâlâš uápu kozzâm. Jo moonnâm ive vaanhimijd šoodâi huolâ luoka puátteevuođâst.
– Lii tergâd, ete párnááh peesih jotteeđ škoovlâ eres sämipárnáigijn já uážžuđ máttááttâs tavesämikielân. Tot addel máhđulâšvuođâ nanodiđ kielâtááiđu já sämmilâš identiteet tääbbin kaavpugpirrâsist, Liisa Sonkamuotka muštâl.
Ovtâskâsluoka máttááttâsâst suulân niäljádâs lii tavesämikielân. Sämikielân máttááttuvvoo pirâsoppâ, sämikielâ já kirjâlâšvuotâ, kuvvimtáiđu já mottoomverd kietâtuojijd. Uáppeeh láá vuossâmuu, kuálmád já niäljád luokkaast.
Liisa Sonkamuotka smiättá, ete vaanhimeh sättih leđe epivissáseh tast, tuástá-uv párnáá pieijâđ sämiluokan, ko luoka puátteevuotâ ij lah vala vises.
Kaavpug haalijd ovdediđ sämikielâ
Oulu kaavpug čuovviittâs- já kulttuurhovdâ Mika Penttilä muštâl, ete kaavpugist lii haalu juátkiđ sämiluoka. Kaavpug meerrid ääšist 2026–2027 luuhâmiveäigi. Penttilä čielgee, ete lopâlâš miärádâs šadda, ko uáinih mon ennuv párnááh sämiluokan liččii puátteevuođâst puátimin.
Oulu lii ive 2026 Euroop kulttuuruáivikaavpug, já sämmilâšvuotâ lii uáinusist tom ive jieškote-uvlágán tábáhtusâi peht. Sonkamuotkah tuáivuh, ete Oulu kaavpug uáináččij áárvu sämipárnái škovliimist nuuvt ete sämiluokan kávnoo ruttâdem.
