Gárasavvona gilážis lea dán rádjai árgan ožžon veahki iežas dearvvasvuođadivššáris. Gili olbmot leat hirpmástuvvan, go Lappi buresveadjinguovlu lea evttohan giddet Gárasavvona dearvvasvuođastašuvnna. Dat lea oassin buresveadjinguovllu viiddes seastindoaimmaid.
– Gal diet lea vehá moraš sáhka. Gárasavvona gilis leat olu boares olbmot. Dat dárbbašit muhtun beivviin goit mannat sestera luhtte jearahallamin makkár ábu dasa oažžu, dadjá Antti-Oula Juuso.
Juuso mielas virgeolbmot eai dáidde áddet, man guhkes mátkkit davvin leat.
– Doppe Ráittejávrris go šaddá vuolgit, dat lea vuos njeallje miilla vuodjit skutteriin dálvit, ja de biillain vel badjel čieža miilla.
Biret-Rávdná Ketola lea beanta suhttan buresveadjinguovllu seastimiidda. Son rámiida iežas gili dearvvasvuođadivššára.
– Dat gal lea dego doavttir. Ja dat gal váldá vuostá goas fal. Dan gal ferte giitit.
Juuso ja Ketola eaba jáhke, ahte Gárasavvona dearvvasvuođastašuvnna giddemiin buresveadjinguovlu boahtá seastit maidige.
Lea maid fuolla das, jus boahttevuođas galgá vuolgit gitta Roavvenjárgii go dárbbaša veahki.
– Ferte geahččalit leahkit dearvvasin, dadjá Ketola.
Olles oarjjabealli orru vajálduvvan eiseválddiin, oaivvildit eanodatlaččat
Lappi buresveadjinguovlu doalai duorastaga Heahtás gullandilálašvuođa, gos olbmot sáhtte muitalit virgeolbmuide maid sii jurddašit seasttuin. Garra sánit maid gullostedje.
– Dii fertebehtet geasehit hearráid fitnat dáppe. Ii giđđat go lea somá baicce dál, vai sii oidnet duohtavuođa, celkkii Birgitta Eira virgeolbmuide.
Gárasavvona dearvvasvuođastášuvnna giddema lassin buresveadjinguovlu áigu heaittihit Muoná seaŋgaossodaga. Muonás lea ožžon buohccidivššára veahki ijat beaivái.
Dilálašvuođa čuvvon Minna Näkkäläjärvi illá nagodii jáhkkit belljiides. Son vásiha, ahte olbmot Giehtaruohttasis gitta Pelloi leat vajálduvvan oalát.
– Mis ii oro leahkimen árvu, ahte dat lea ruhta mii mearrida ja dan ruđa ovdii dat dahket visot seastimiid, dadjala son.
Buresveadjinguovlu: Bálvalusaid ordnejit dohko, gos leat eambo olbmot
Gullandilálašvuođas čavggahedje čielga loguid seasttuin, muhto dat gárvánit easkka boahtte vahkus. Olbmot háliidedje diehtit, manin Muoná seaŋgaossodat giddejuvvo ja Gihttelis dat seailu.
– Gal dat nu lea, ahte bálvalusaid čohkkejit dohko, gos eanaš oassi olbmuin ásset, ja gos leat bargit ja dárbu bálvalusaide, čilge buresveadjinguovllu sodeguovddáža jođiheaddji Antti Alaräisänen.
Son goittotge dadjá, ahte buresveadjinguovlu boahtá fuolahit sámegielat olbmuid rivttiin.
– Galhan buresveadjinguovlu ferte dalle ordnet sámegielat bálvalusa, jus ovdamearkan seaŋgaossodat sirdašuvvá Gihttelii.
Alaräisänen muitala maid, ahte buresveadjinguovllus leat rehkenastán, ahte Muoná seaŋgaossodaga heaittiheami dihte ferte lasihit ámbulansameari oarjjabealde Lappi.
– Guokte vuosttasdikšoovttadaga galggašii fidnet lasi ja oalle sihkkarit daid báikkit livčče Gihttelis ja Soađegilis.
Giehtaruohttasis ledje čoaggán nammaadreassa Muoná seaŋgaossodaga seailluheami beales. Dat geigejuvvui gullandilálašvuođas Lappi buresveadjinguovllu virgeolbmuide.
Lappi buresveadjinguovlu lea ordnen gullandilálašvuođa skábmamánu áigge miehtá Lappi guovllu. Dilálašvuođat leat báddejuvvon ja daid sáhttá geahččat buresveadjinguovllu neahttasiiddus.
