Dieđátgo don maid galgá bargat dalle go fáhkka buollá? Bártteha gilis goit máŋgasat dihtet, go sii ožžo das oahpu lávvardaga.
Anára doaresbeale giliin leat dál buorebut ráhkkanan, go Inarin turvalliset kylät nappo Anára dorvvolaš gilit -fidnu lea johtán miehtá giliid addimen dorvvolašvuođaskuvlejumiid. Fáddán lea leamašan ovdamearkka dihte vuosttasveahkki ja buollindorvvolašvuohta, muitala prošeavtta bargi Heini Kontsas.
– Mii leat fitnan logemađe gilis. Leat oahpahan juohke gilis mo birget 72 diimmu iehčanassii. Dasto leat leamašan čáskadandáidduin ja vuosttasveahkis skuvlejumit, logahallá Heini Kontsas.
Bajit buollinčáskadeaddji Kari Sellman bođii Bárttehii oahpahit mo smávva buollima galgá čáskadit. Son jáhkká, ahte doaresbeale giliide addojuvvon oahpus lea ávki.
– Gilisearvvit leat ožžon olu buorre skuvlejumiid. Leamašan midjiidege somás ja addevaš bargu fitnan oahpaheamen, dadjá Sellman.
Skuvlejupmi addá oadjebasvuođa
Bárttehis lea diimmu vuodjinmátki Anára girkosiidii. Anáris lea maiddái lagamus eaktodáhtolaččaid buollinčáskadeaddjiid báiki. Lea dehálaš máhttit addit goit juoganulágan veahki, jurddaša Bártteha gilisearvvi ságajođiheaddji Jonna Miss.
– Go leat guhkes gaskkat ja veahki oažžun ádjána, de lea dehálaš ahte dáppe lea diehtu ja dáidu mo doaibmat, dadjá Miss.
Fidnu vehkiin Bárttehii ožžot váibmovuolggaheaddji
Ealáskahttindáiddut leat dehálaččat juohke sajis muhto eandaliige doppe, gos ambulánsa lea guhkkin.
Bárttehis oahpahalle eandaliige jielluma ja rivttes távtta. Jus bealle diimmu gártá jiellut, iežas gorut ferte leat rivttesláhkai amas seammás searahuvvat.
Kontsas muitalii somás detaljan, ahte rivttes ritmma sáhttá hárjehallat musihka vehkiin. Neahtas gávdnojit musihkaapplikašuvnnat, gos sáhttá ohcat čuojahanlisttuid, gos leat beare dakkár lávlagat, main lea rivttes jielluntákta. Daid gánniha guldalit ovddalgihtii, rávvii Kontsas.
Oktan konkrehta ovdamearkan dán prošeavttas sáhttá doallat maiddái dan, ahte Bárttehii leat oččodeamen iežas Defibrilláhtor-mášena. Váibmočaskkan sáhttá heahtedilis gádjut váibmobuohcci heakka. Dan geavaheami maid besse hárjehallat.
Skuvlejumit joatkašuvvet vel boahtte giđa, go Anára dorvvolašgilit -fidnu lea ožžon joatkaga boahtte giđđii.
– Giđđat vel bastet skuvlet ja vejolaččat juobe dakkár fáttáin maid olbmot ieža sávvet, loahpaha Kontsas.
