Mueʹdd eeuʹr mähss instemkääzzkõʹsse leʹbe hotella juõʹǩǩ iinnâst. Aainâs näkkam määus lie âânnmõõžžâst määŋgin sõõʹjin Eurooppâst, koʹst määtkla jåʹtte jiânnai.
Näkkam maatkčempiiđ leʹbe -määus leät ââʹn valmštõõllmen še Lääʹddjânnmest. Määus haaʹleet Lappi vuuʹd kooʹddid ääukted ouddmiârkkân turiism oouʹdummuž da infrastruktuur tuõʹllʼjummuž.
Lääʹddjânnam riikksuåvtõs alttad veâl tän eeʹjj beäʹlnn pääiklai da kooʹddi kuullmõõžžid, koin seʹlvvtet vooudlaž maatkčem-määus oudldõõzzid.
– Jurddjen lij, što mähss puäđči âânnmõʹšše ääiʹjmõsân eeʹjj 2027, mušttal vooudlaž maatkčempiiđ valmštõõllmõš -haʹŋǩǩõõzz koordinaattor da piiđäʹšštobddi Ella Luikku.
Mähss vieʹǩǩteʹči jiânnai vooudlaž ouddnummuž, vuäinn kåʹddjååʹđteei
Lappi lâssneei määtklai mieʹrr lij šõddääm vueʹjj, mâʹst kååʹdd da gåårad âʹlǧǧe ââʹnned huõl infrastruktuurâst da määtklain di tuejjeed jeeʹresnallšem aaʹššid, kook lie šõddâm, ko määtkla lie čuuʹt jiânnai, vuäinn Aanar kåʹddjååʹđteei Tommi Kasurinen.
– Jiõčč vuäinam tän vääžnʼjen, što maatkčem-määusnallšem lij aalmilaž: Eurooppâst juõʹǩǩ riikkâst muu fiʹttjõõzz mieʹldd määuʹset måtam eeuʹr hoteʹlliinnâst. Tät lij normaal määtklaid, särnn Kasurinen.
Aanar lij õhtt tõin Lappi lannu kooʹddin, kååʹtt väldd maatkčem-määus šiõǥǥ miõlin vuâstta. Ruäʹvnjaarǥ gåårad lij še miõlstes väʹlddmen mähssriâžldõõǥǥ âânnmõʹšše.
Lappi voudda vueʹrdet määtklaid miljooni mieʹldd taʹnni. Maatkčem-määusain kooʹddin lie pueʹrab vuäittmõõžž oouʹdeed turiism da jiijjâz vuuʹd.
– Teäʹǧǧ õõlǥči tuõđi mäʹcced tiiʹǩ, što tõn vueiʹttep ââʹnned maatkčummuž oouʹdeem da tõn staanvuõđ lââʹzztem diõtt, särnn Kasurinen.
Sosiaalʼlaž ǩiõrddâmvuõtt prioriteʹtten
Teimma täʹlvvsesooŋŋ ääiʹj Aanar kååʹddest pâjjne jiânnai huõl turiism veiddnummšest. Ouddmiârkkân Aanar kååʹdd sosiaal- da tiõrvâsvuõttkääzzkõõzzin da turiisti aautin jååttmõõžžâst jiârǥin, mâid seeʹst ij leäkku harjjnummuš.
Aanar kåʹddjååʹđteei miõlâst lij vääžnai, što turiism oouʹdeet pääiklai da pääiklaž luâđ määinaivuiʹm.
– Meeʹst âlgg kååʹddest da kååʹdd tuʹmmstõõǥǥin ärvvtõõllâd tärkka nuʹtt sosiaalʼlaž ǩiõrddâmvuõđ ko še aalmilaž priimmʼmõõžž.
Kasurinen vuäinn, što määtkla puäʹtte Aanar kådda ooccâd jeeʹresnallšem aaʹššid: Suâlčiõʹlj lij maatkčemkõõskõs, ko däs Aanar ceerkavsiidâst oummu åʹcce seuʹnnjõõzz da jõõskâsvuõđ.
– Määtkla puäʹtte tiiʹǩ jeeʹresnallšem profiilivuiʹm, leâša mij luâtt lij pukid õhtteei mäinn: tõʹnt meeʹst feʹrttai ââʹnned huõl mij luâđast, smeâtt Kasurinen.
Maatkčem-määus lie valmštõõllmen riikksuåvtõõzz da kooʹddi lââʹssen jeeʹresnallšem vooudlaž organisaatio di turismmsueʹrj da jieʹllemvuõʹjji ouddorganisaatio. Riikksuåvtõõzz altteem haʹŋǩǩõs aaʹlji mõõnni neäʹttlest.
