Anáris idjadeamit ja dietnasat leat olahusloguin. Gielddas doibmet stuorra turismafitnodagat muhto maiddái guokte báikkálaš bearašfitnodaga: Náittosbárra Mari ja Jouko Lappalainen ja vieljažagat Tommi ja Tuomas Lappalainen.
Guktuin Lappalaš-bearrašiin lea stuorra sajádat Anára guovllu turismmas. Sohkanamas fuolakeahttá sii eai leat fulkkežat.
Mari ja Jouko Lappalainen oamasteaba Wilderness Hotels & Safaris -fitnodaga. Guovttelogi jagis soai leaba oastán ja vuođđudan máŋggaid turismabáikkiid - ovttaskas barttain gitta hoteallaide.
– Stuorrun ii leat leamašan ulbmil baicce čuovvumuš movttas. Lea dáhttu ovddidit ja mannat ovddosguvlui, dat gáibida oastima, čilge Jouko Lappalainen.
Sin bearašfitnodagas leat Anáris 7 sierra turismabáikki ja Soađegilis okta. Ođđasamosat dain leat Wilderness Hotel Saariselkä ja soai osttiiga maiddái luopmobartabáikki Avvila ja Anára gaskkas.
– Dan moai letne guhkká háliidan. Dat lea okta gieldda čábbámus báikkiin, muitala Mari Lappalainen.
Dehálaš mii oidno glássaráiggis
Mari ja Jouko Lappalainen hoteallain vihtta leat Anára gielddas. Eaba soai oastimin oastte hearvva dihte baicce dan mielde, mo báikki sáhttá ovddidit.
– Ferte leat čáppa báiki, gos sáhttá ordnet doaimmaid, muitala Jouko Lappalainen.
Wilderness Hotels & Safaris -fitnodagas barget dálvit badjel 400 olbmo. Diibmá fitnodagaid gávpejohtu lei 37 miljovnna euro, supmis leat váldán vearu eret muhto dasa eai leat rehkenastán goluid.
Mari ja Jouko Lappalainen eaba hálit oamastit beare ovtta turismabáikki baicce gilvit doaimmaid duohkut deike. Soai leaba viiddidan fitnodagas doaimmaid eandaliige Saariselkä guovllus.
– Dat lea báiki, gos háliidetne oidnosiid dihte leat.
Mari Lappalainen lohká, ahte dál oasttašeapmi lea bottus, baicce jus vuovdimassii boahtá juoga čáppa báiki.
– Lea somá ordnet báikkiid.
Vieljažagat háliideaba ovddidit turisma birra jagi doaibman
Nubbi mearkkašahtti turismadoaibmi Anáris lea Tommi Lappalainen vieljainis Tuomas Lappalaisin. Soai oamasteaba Visit Inari.
Sin bearraša turismafitnodat álggahii 1980-logus. Dalle sudno áhčči ja áddjá ordniiga safariid ovttas boazodoalliiguin ja maiddái čuoigantuvrraid. 2000-logus fitnodat fállagođii idjademiid. Sudno fitnodaga gávpejohtu lei lei diibmá 7 miljovnna euro.
– Ulbmilin lea ovdánit mearrediđolaččat ja lasihit idjademiid meari birra jagi. Go oastá báikki, ferte leat vejolašvuohta ovddidit dan doaimma, dadjá Tommi Lappalainen.
Jagis 2007 sii oste Anáris bartagili, jagis 2016 Hotelli Inari ja dán čavččages Hotealla Kultahippu Avvilis. Dál ii leat oastinmiella.
– Dásge lea jo nohkka hommá, muitala Tommi Lappalainen.
Turismavearru sáhtášii doarjut Anára bálvalusaid
Guktot fitnodatdoallibearrašat háliideaba turisttaid boahtit Anárii birra jagi.
– Turisma livčče álkit hálddašit, jus turisttat livčče birra jagi, dadjá Jouko Lappalainen.
Anára gielddas leat olu dálveturisttat, eará áiggiin lea jaskat, oaivvildeaba Mari ja Jouko Lappalainen.
Sudno mielas Anárii šihttet gal vel lasi turisttat. Tommi Lappalainen mielas turisma ii sáhte stuorrut badjel rájá, ferte baicce bastit seailluhit gili láganin, go dat lea Anára nanusvuohta.
– Jus beare hoiget eanet aht`eanet turisttaid, das eai liiko báikkálaččat, eaige geatge earátge. Turisma stuorruma ferte hálddašit nu, ahte bálvalusat ja báikkálaččat bissot fárus. Dássážii dan leat hálddašan muhto dál leat viehka lahka rájá.
Tommi Lappalainen guottiha dihto eavttuin turismavearu man plánejit ja man gieldage háliida. Lappalainen mielas dat lea buorre, jus dat livčče govttolaš ja dan čoakkášedje maiddái Airbnb-idjademiin.
– Go fal ruhta boahtá deike, gos dan čoggetge. Dat danin, vai dainna basttášedje vaikkoba bálkáhit dearvvasvuođaguovddážii lasi bargiid dahje doarjut nuoraidbarggu.
