Dán iehčanašvuođa beaivvi guokte sámi duojára, Gáva Ilmár, Ilmari Tapiola ja Ásllat Niillas Jovnna nappo Fanas Jovnna, Jouni Laiti oaččuiga Suoma stuorámus dáiddáriide oaivilduvvon Suoma ledjona rijddárgotti Pro Finlandia -gudnemearkkaid.
Tapiolai ja Laitii geigejedje mearkkaid duorastaga oahpahusministeriija ordnen dilálašvuođas Helssegis. Dilálašvuođas lei mielde presideanta Alexander Stubb, guhte mieđiha gudnemearkkaid.
Gáva Ilmár nappo Ilmari Tapiola ii livčče goassige máhttán vuordit, ahte son lei galgat oažžut dakkár gudnemearkka.
– Lean láven lohkat aviissas, geat leat fidnen medálja. Dat leat leamašan stuorra máhttit ja dovddus olbmot. Loktanedje gal stuorra dovddut doppe dilálašvuođas. In vuordán, ahte mu dáidduin oaččošii dákkára, dadjá Tapiola.
Jouni Laiti lea dovddus fanasduojár Ohcejogas, danin su dovdetge namain Fanas Jovnna. Son maid njuorrasii, go oaččui dieđu, ahte sutnje geigejit stuorra gudnemedálja.
– Mu mielas dat lei stuorra boddu ja duojáriidda addon stuorra gudni dál. Ja stuorra gudni, ahte dákkára fidne vel dábálaš fanasduojár, muitala Laiti.
Gudnemearka addá árvvu sámi duodjái
Gava Ilmár duddjo juohke beaivve ovdamearkka dihte niibbiid ja čiŋaid iežas bájis Ohcejogas.
Eandalitge nuoraide son háliida dadjat, ahte gal duddjomiinge eallá.
– Gal dat liikká dál olbmot árvvoštit sámi duoji. Galgá álo leat mielas, mo sáhttá ovddidit duoji. Sámi álbmot lea dehálaš, geasa duddjot, muhto gal sáhttet geavahit earátge daid, dat lokte duoji árvvu.
Dál gudnemearka buktá olu ođđa inspirašuvdna iežas bargui ja duodjesuorgái.
– Gal dat addá ođđa jurdagiid ja sáhtán ovddidit dán min sámi duoji ii dušše sápmelaččaide, baicca maiddái earáide, smiehtada Tapiola.
Jouni Laiti lea maid fuolas das, joatkašuvvágo duodjeealáhus ain dás ovddosguvluige.
Eai leat šat máŋga olbmo, geat ain máhtet duddjot árbevirolaš Deanu fatnasiid. Su dieđuid mielde fatnasiid ii duddjo su lassin go okta.
– Deanus fanasduojárat gal nohket áibbas. Eai leat joatkkit, ii leat musge joatki. Orru ahte nohká dat duodji, morašta Laiti.
Son ieš áigu goit duddjot nu guhká, go fal veadjá.
– Barggan dál morášbarggu, go iešge boarasmuvan ja ferten farga heaitit. Duddjon velá juohke beaivve, beaivi ain hávil, dadjá Laiti.
