Davvi-Suoma hálddahusriekti lea juovlamánus addán mearrádusaid, mas dat lea gomihan guokte Tukesa (Dorvvolaš- ja kemikáladoaimmahaga) mieđihan golledoidinlobi Sámedikki váidagiid vuođul.
Álgoálggus Sámediggi váiddii mearrádusain jagis 2023, go Tukes ii lean árvvoštallan dohkálaš vugiin lobiid váikkuhusaid sámiide.
Hálddahusriekti gomihii lobiid ja máhcahii daid Tukesii ođđasit válmmaštallamii. Tukes čovddii ášši vuot seamma láhkái ja seamma ákkain, ja Sámediggi fárttai váidit mearrádusain ođđasit hálddahusriektái.
Juovlamánu 10. beaivve hálddahusriekti gomihii fas lobiid ja gávnnahii Tukesa doaibman hálddahuslága vuostá. Hálddahusriekti gávnnahii earret eará, ahte váidalusa vuollásaš mearrádus ii váikkuhusárvvoštallama oasil deavdde hálddahuslágas mearrádusa njuolgguslašvuhtii, áddehahttivuhtii sihke ákkastallamii ásahuvvon gáibádusaid.
Hálddahusriekti gáibida, ahte Tukes hálddahusrievtti mearrádusaid, ođđa sámediggelága sihke duohtavuohta- ja soabadankomišuvnna loahpparaportta maŋŋá gudnejahttigoahtá sápmelaččaid rivttiid ja váldá daid duođas vuhtii mearrádusdahkamis.
Golledoidimis lea mearkkašahtti váikkuhus guovllu boazodollui
Golledoidinlobiid ledje ohcan Bátneduoddara guvlui, Selperinoja ja Palsinoja ádjagiid lahkosiidda. Dat deivet maid leat Avvila bálgosa guovllus ja leat bohccuid birrajagi guohtuneatnamat.
Váidaga mielde Tukes ii lean árvvoštallan golledoidinlobi váikkuhusaid guovllu sámi boazodollui. Palsinoja guvlui leat váidaga mielde maid ruvkeregisttara dieđuid vuođul šaddan mearkkašahtti golledoidinguovlu, man dihte ovdamearkka dihte ádjaga rasttildeapmi lea šaddan váttisin ja báikkuid joba veadjemeahttumin.
Palsinoja guovlu lea dehálaš Avvila bálgosa boazodollui geasseguohtun- ja guoddinguovlun. Olles bálgosa bohccuin sullii njealjádas guohtu doppe giđas čakčii ja sullii bealli bálgosa čoavjjehiin riegadahttá misiid doppe. Avvila bálggus leage oaivvildan, ahte guovllu galggašii ráfáidahttit golledoidimis ollásit.
