Karjalan kieli on suannuh enzimästy kerdua virrallizen specialistuelimen Suomes.
Kodimualazien kielien keskukseh (Kotus) perustettu karjalan kielen komissii andau nevvuo kieldy koskijois kyzymyksis. Nengomat kielikomissiet ollah oldu jo aijemba olemas suomen, ruočin da saamen kielil sego romanikielel da viiputuskielel.
Kielikomissien paginanvedäjäkse on nimitetty Helsingin yliopiston professoru Riho Grünthal da varapaginanvedäjäkse Ilja Mošnikov Päivännouzu-Suomen yliopistospäi. Komissien sekretarinnu ruadau Niko Tynnyrinen. Muut ozanottajat ollah Olga Karlova, Eeva-Kaisa Linna, Elena Rapa, Markku Suksi, Martti Talja da Outi Tánczos.
Karjalan kielen kehitändäs da käytändön kieliruavos vastuau Päivännouzu-Suomen yliopisto. Yliopistol on valdukunnalline eričysruado karjalan kielen tutkimukses, opastandas da elvytändäs.
Karjalan kieldy pagizou Suomes arvivon mugah nenga 10 000 hengie. Uvven kielikomissien perustandu ei muuta kielen virrallistu azemua, ga se tuou karjalan kielidieloloih alalližuttu da ližiäy mahtoloi kielen elvytändäh da kehitändäh.
Karjalan kielen asemaan merkittävä parannus Suomessa – sai ensi kertaa virallisen asiantuntijaelimen