Policii tutkiu mustovoimattoman naizen kuolendua hoivukois. Policii ebäilöy rikostu kuolendantapahtukses, kudai rodih turkulazes hoivukois mennyt kuul. Mustovoimatoi naine kuoli Esperi Caren hoivukois Turrus talvikuul. Omahizien mugah naine oli sivottu stuulah da häi kuoli kuristumal. Policii sellittäy, liittyygo kuolendah huolen pidämättäh jätändiä libo muudu zakonah perustumattomua dieluo. Specialistoin mugah vahnoi ristikanzoi toiči sivotah kohtah, ei täydyne hoidoruadajua.
Piäministru Petteri Orpo kannattau socializen medien kieldämisty al 15 (viizitostu)-vuodizil. Orpon mugah ekruanuaigu libo mobiil’ulaittehil käytetty aigu on yksi suurembis estielöis lapsien da nuorien liikundale da himoruadoloile. Orpon mugah perehii da lapsii pidäy kannustua liikundallizeh eloksentabah. Australii on muailman enzimäine mua, kudai on kieldänyh somen käytön kaikil al 16 (kuuzitostu)-vuodizil. Äijät Euroupan muat duumaijah samua.
Tuhanzii thaimualazii on puuttunuh vuozien aloh velguridah kerätes Suomes muarjua. Dieloh näh tiijustettih Kalevi Sorsa -fondan jullatus raportaspäi. Raportah on kerätty piäl nellänsuan thaimualazen muarjuniekan kogemustu ruadamizes Suomes libo Ruočis. Läs kai kyzelyh vastannuot muarjuniekat velgavuttih muarjoin keriändymatkoin täh. Thaimuaspäi on tuodu Suomeh kymmenii tuhanzii muarjuniekkoi vuvves 2005 (kaksituhattu viizi) algajen.
Sateliittupaikanduksen häiričendy Suomen alovehel on kazvanuh äijälgi vuvves 2022 (kaksituhattu kaksikymmen kaksi) algajen. Häiričendiä tulou Ven’alpäi. Muanmiäriändylaitoksen sellityksen mugah häiričendy on ylehine dielo enne kaikkie Päivännouzu-Suomes, kus vahinguo roih paiči muudu lendoliikendehele, merenkullule sego pellatusruadoloile.
Iranas arvivon mugah on kuolluh sadoi libo toinah tuhanziigi mielenozutuksis muan hallinduo vastah. Tarkoin tiedoloin suamine Iranaspäi on jygei, sendäh gu mua rajoittau omien kanzalazien yhtevyksii ulgomuailmah. Yhtysvalloin prezidentu Donald Trump on äijän kerdua varaitannuh Iranua iškuloil, ei heittäne hallindo rahvahan tapandua. Iranan vägivaldažuksien täh ollah huolevuttu muailman eri čuril.
Helsingis on ozutettu mieldy Iranan posol’stvan ies. Mielenozuttajat kritikuittih Iranan hallinduo uskondon- da sananvällyön rajoitandas sego iranalazien mielenozuttajien pahaspiendäs. Suomen ulgoaziiministerstvu on paissuh Iranan posol’stvan azienhoidajanke tilandeheh näh.
Lapis on olluh jälgimäzien päivien aigua äijy vilun ilman täh ruattavua pellastusruaduo. Lapin pellastuslaitos da rajavardivosto ollah pellastettu suksittajii, kudamil oldih ezimerkikse pahoi kylmetty sormet libo varbahat. Heidy on tuldu ottamah muastospäi motočunil da vertol’otoil. Abuu on tarvittu enimite Urho Kekkozen kanzallispuustos. Poikkevuksellizeh pitkän vilun aijan aloh pakkastu on olluh kai piäl 40 (nellänkymmenen) astehen.
Karjalan Sivistysseura julgai kylmykuul suomenkielizen Karjalan kielen elvytysohjelma pähkinänkuoressa -oppahan. Talvikuul opas piästettih ilmah sežo karjalakse nimel Karjalan kielen elvytysprogramma oriehankuoressa. Karjalankielizes versies on käytetty karjalan kolmie piämurrehtu. Opas ozuttau elvytysprogramman piälimäzet syväindöt da sanou, kui ezimerkikse organizaciet, perehet da yksittäzet ristikanzat voijah eistiä edehpäi karjalan kielen käyttyö.