Buot áiggiid stuorámus sámi dáidaga ja duoji čájáhus Eanangiella rahppojuvvui bearjadaga Oulu dáiddamuseas. Čájáhus ii dušše čalmmiid biepma muhto beljiid maiddái.
Čájáhusas leat oaidnin láhkai badjel 120 dáiddabarggu 76 dáiddáris. Dat lea oassin Oulu 2026 -kulturoaivegávpoga dáhpáhusaid.
Čájáhusa kuráhtorat leat Inga-Wiktoria Påve, Fredrik Prost ja Áilu Valle. Prost muitala, ahte sii leat geahččalan ovdanbuktit čájáhusas olles Sámi ollisvuođa.
– Mii leat geahččalan ovdanbuktit sámi eallima, sámekultuvrra ollisvuođa, ahte okta oassi ii sáhte gávdnot nuppi haga, čilge Prost.
– Rukses láigin čájehit sámi čábbodaga, muitalages Påve.
Čájáhus lea temáid mielde sierra lanjain
Čájáhus lea juhkojuvvon sierra lanjaide ja juohke lanjas lea iežas temá. Ovtta lanja temán lea ovdamearkka dihte vuoiŋŋalašvuohta.
– Dáppe leat guhtta lanja, maidda mii leat juohkán máŋggaid sierra fáttáid. Mii leat geahččalan loktet daid fáttáid siste dujiid ja dáidaga, mii lea min mielas mearkkašahtti dien fáddái, čilge Påve.
Čájáhusas gávdno maiddái čiŋahuvvon eallin -nammasaš latnja. Doppe leat oaidninláhkai dávviriid lassin átnubiktasat.
– Go eallit guorba dilis, sámi duodji ferte leat anolaš muhto maiddái čáppis. Olbmot ožžot das ilu ja fámu, muitala Áilu Valle.
Oaidnimis eai leat beare dálá áiggi dáidagat dahje duojit. Kuráhtorat leat bargan ovttas sámemuseaiguin.
– Mii leat beassan olu museaid vuorkkáide ja doppe mii leat luoikan dáidaga ja dujiid, muitala Inga-Wiktoria Påve.
Čájáhusas leatge duojit ja dávvirat Sámemusea Siidda, Museo-Galleria Andreas Alariesto, Ruoŧa duottar- ja sámemusea Ájtte ja RiddoDuottarMuseat – Sámi Dáiddamagasiidna čoakkáldagain Norgga bealde.
Fredrik Prost sávvá sápmelaččaid mannat geahččat čájáhusa.
– Mun goit sávan, ahte visot sápmelaččat mannet dáppe ja sii illudit seamma olu go mii, geat leat bargan dáinna čájáhusain. Ja ahte olbmot dovdet sin sihke oahppan ja ožžon dego ođđa fámuid das.
Čájáhus giddejuvvo Oulu dáiddamuseas muttuid mielde, badjegeardi steŋgejuvvo cuoŋománu beallemuttus ja bodnegeardiges miessemánu álggus.
