Elle Káren Ketola ja Siiri Ketola leaba beassan ođđa ráiddus iskkadallat iešguđetlágan ámmáhiid.
Ráiddus soai oahpásmuvvaba heastadoalli, baleahtadánsu, pilohta, govvejeaddji, viessočiŋaheaddji ja lávlu ámmáhiidda. Elka ja Siiri niehkobargguin -ráidu lea dál geahččanláhkai Yle Areenas.
Elle Káren ja Siiri leaba máŋgasii oahppásat, go soai leaba leamašan láidesteaddjin ovdamearkka dihte sámegielat ráidduin 8 jagiáiggi ja Iežas lanja DIY-studio. Buot dát ráiddut leat oassin Yle Galaxi mii fállá sisdoalu skuvlalaččaide.
Elle Káren Ketola mielas lei suohtas ja speanta govvet ráiddu.
– Mun bessen dahkat olu áššiid maid in leat ovdal dahkan, muitala Ketola.
Ráiddus soai beassaba fitnat oahpásmuvvamen ámmáhiidda ovttas ámmátolbmuiguin. Ráiddus soai geahččaleaba earret eará girdinsimulahtora ovttas girdi Erkki Nordbergin ja oahpásmuvvaba artistta eallimii Ella Marie Hætta Isaksen láidestemiin.
– Dat girdin lei suohttaseamos ja beroštahttii mu eanemus, árvala Elle Káren.
Elle Káren Ketola vázzá dál logahaga ja Galaxi govvemiin son fitná skuvlaluomuid áigge. Son ii leat vuos áibbas sihkkar, mii livččii su niehkoámmát, váikko girdin dál geasuhage.
Ráidu addii buorre vejolašvuođa oaidnit sierra ámmáhiid beaivválaš doaimmaid ja oahppat ođđa áššiid. Vuordemeahttun áššit maid bohte, go heastafitnošeaddji luhtte galledettiin čielggai, ahte okta heasta borrá beaivvis sullii 10 kilo suoinni.
– In livččii goassige jáhkkán, man olu heasttat borret suoinni.
Yle Galaxi buvttadeaddji Krista Kvick muitala, ahte kulturrájáid rasttildeaddji ovttasbargu oappážiiguin lea leamašan dehálaš ja gánnehahtti. Sámegielat prográmmat leat olahan bures maiddái suomagielat geahččiid ja nieidaguovttos leabage šaddan ovdagovvan máŋgasiidda.
