Ive 2024 almostui suomâkielân digitaallâš oppâmpiirâs Mainâsviäsu-spellâ. Tääl tot lii finniimist meiddei kulmáin sämikieláin.
Speelâ ulmen lii tuárjuđ 5.–9.-luokkalij oppâmmoovtâ. Tárguttâs lii faallâđ máhđulâšvuođâid meid sämikielâg párnáid ovdediđ sii maaŋgâluuhâmtááiđu jieijâs kieláin.
Maaŋgâluuhâmtáiđu uáivild, et olmooš máttá luuhâđ, iberdiđ, tulkkuđ já meiddei čäälliđ sehe pyevtittiđ jieškote-uvlágán teevstâid.
Laapi ollâopâttuv šoddâdemtiettui, eromâšávt arktâsij škovlimkoččâmušâi professor Pigga Keskitalo lii ohtâ Mainâsviäsu jotá Sáámán -haavâ pargein. Sun iätá, et ulme jurgâliđ speelâ meiddei sämikieláid lâi aalgâ rääjist fáárust.
– Mij arvâlijm, et tággáár tyejiniävvu sátáččij leđe sijjân suotâs já movtijdittee. Tondiet mij lep ráhtám taam speelâ meiddei orjâlâš-, anarâš- já nuorttâlâškielân, muštâl Keskitalo.
Jis ij tarbâšiččii jurgâliđ, puávtáččij spellâmaailmist leđe eenâb sämmilâšvuotâ
Mainâsviäsu jotá Sáámán -haavâ nettisijđoin iättoo, et sämikielâg máttááttâsâst Mainâsviäsu-speelâ kevttim lii rahtum älkken.
Speelân láá tohhum sehe spellâmravvuuh já pedagogisiih ravvuuh.
Mainâsviäsu lii movtijdittee, vuáruvaigutteijee já kulttuurlávt sensitiivlâš oppâmpiirâs, kost sämikielâ oppâm tábáhtuvá spellâm já kreatiivlii čäällim peht, mainâstuvvoo haavâ nettisijđoin.
– Jis tággáár speelâ rahtuuččij njuolgist sämikielân ijge tarbâšiččii jurgâliđ, te talle puávtáččij rähtiđ meid ubâ speelâ maailm sämikulttuur peht, iätá professor Keskitalo.
Sun lasseet, et tuáivuimield puátteevuođâst ličij taggaar spellâ, mii ličij eidu rahtum sämmilâš mainâstemärbivyevi mield.
