Keuruun Pihlajaviele Koipijärven jiäle maidopyhälaskunnu oli kerävynnyh kymmenii ristikanzoi azumah lumianheliloi.
Keuruun prihodu da Pihlajavien kyläyhtistys organizuittih tembavuksen, kudaman tarkoituksennu oli luadie jiäle vähimyölleh 500 lumianhelii kahtes čuasus.
Idejan keksi Pihlajavien Wanhan pappilan omistai Katri Weiste.
- Smietiin, midä olis ruadua, gu lundu ei ole äijiä da sit čökkäigi piäh nengoine ajatus. Minul puaksuzeh midätah mostu čökkäilöy piänahkah, sanou Weiste.
Lumianheliloih liittyjiä rekordua muailmal on luajittu vähimyölleh kaksi. Yhtysvalloin Pohjas-Dakotas läs 9 000 hengie azui vuvvennu 2007 yhteh aigah samazes kohtas lumianhelin. Vuvvennu 2011 Kanadas Nova Scotias omas puoles luajittih 130 eri kohtis enäm 22 000 lumianhelii.
Ristikanzoin miäräs Koipijärven jiäl jiädih loitokse Yhtysvalloin da Kanadan lugulois. Paikal oli vajuat 40 hengie, kudamat luajittih 35 minuutas 1 079 lumianhelii. Kahten čuasun kogonaine miäry oli 1 105 anhelii.
Nuorimal lumianheliloin luadinuol igiä oli vai 11 kuudu da vahnimal 76 vuottu, sanou Weiste.
Weisten mugah tulien vuvven tavoittehennu on luadie samazes aijas 2 000 lumianhelii.
Keuruulla tempaistiin laskiaissunnuntain kunniaksi: yli tuhat lumienkeliä kahdessa tunnissa