Sámedikkis illudit Lappi buresveadjinguovllu guovlostivra vuossárgga dahkan mearrádusas seailluhit Muoná seaŋgaossodaga ja Gárasavvona dearvvasvuođabálvalusaid. Avvila birrajándora doavttirgohcin lei jo árat gahčahuvvon eret heaittihanplánain.
Sámedikki ságadoalli sadjásaš Tuomas Aslak Juuso giitalage guolvostivrra politihkkariid.
– Mii leat bargan hui garrasit dan ovdii, ahte dan ollisvuođas nu Avvil go Muoná ja Gárasavvonge sáhtášedje seailut. Ja lea máilmmi buorre dovdu, ahte leat lihkostuvvan. Politihkalaš dássi buresveadjinguovllus lea guldalan sámedikki ja váldán vuhtii sámedikki oainnu.
Lappi guovloráđđehus lei evttohan guovlostivrii Gárasavvona dearvvasvuođadálu giddema muhto guovlostivra mearridii seailluhit dan. Guovlostivra jienastii áššis ja jienain 41- 17 dat seailluhuvvo, čállá Lapin Kansa -aviisa.
Sámediggi lea ráđđádallan buresveadjinguovllu politihkkariiguin ja virgeolbmuiguin buresveadjinguovllu seastinplánain ja dan váikkuhusain sápmelaččaide ja maid sámeguvlui.
Sámediggi lea maid čállán rabas reivve, mas dat buktá ovdan fuola seastinplánaid váikkuhusain. Reivves čállo ovdamearkka dihte, ahte bálvalusat leat mearkkašahttit baicce buohkaide guovllu áššehasaide, maiddái erenomážit sámeálbmogii guhkes mátkkiid ja sámegiel bálvalusaid dihte.
Tuomas Aslak Juuso dadjá, ahte bálvalusaid doalaheamis lea dehálaš váikkuhus davvin. Ovdamearkka dihte jus Gilbbesjávrris olmmoš livčče šaddan gitta Gihttelii vuolgit seaŋgaossodahkii.
– Galhan sámegielat bálvalusa dohko oažžun livčče lean oalle hástaleaddji. Bargiid sirdin dohko ii lihkostuva nie fal, oaivvilda Juuso.
Buresveadjinguovlu galgá seastit 40 miljovnna euro ja danin árvvoštallet heaittihit dearvvasvuođabálvalusaid miehtá Lappi.
