Säämist lii lamaš jieškote-uv kieldâst kiävtust jieškote-uvláván uásálistee budjetistem.
Ive 2020 rääjist Aanaar uásálistee budjetistem ruttâsumme lii lamaš ain 10 000 eurod, mut taan ihán toos lii väridum 20 000 eurod.
– Mij juurdijm, et, ko Aanaar kieldâ tiävdá taan ive 150 ihheed, te halijdijm meiddei uásálistee budjetistmist väldiđ tom uáinusân, já luptiđ hade 10 000 eurost 20 000 euron, muštâl Aanaar kieldâ pyereestvaijeemkoordinaattor Leena Korhonen.
Sämikieldah halijdeh uásálistittiđ páihálijd kieldâ budjet vuáváámân
Ucjuuvâst uásálistee budjetistem lii vuosmuu tove kiävtust. Ruttâsumme lii 6000 eurod. Tot kiävttoo taan ive kieldâ kuulmâ siijdâ uáinus pyereedmân. Jyehi siijdâ uážžu 2000 eurod jieijâs kiävtun.
Iänuduvâst já Suáđikylást tot lii lamaš ive 2023 rääjist. Suáđikylá lii kiävttám enâmustáá ruuđâ uásálistee budjetistmân, taan ive joba 50 000 eurod.
Iivij 2023 já 2024 Iänuduvâst lijjii 15 000 eurod kiävtust uásálistee budjetistem várás já toh kiävttojii Hettan. Vistig pieijui vuojâdemrido oornigân, talle sierâdemkieddi.
Suáđikylást lii lamaš ain stuárráámus meeri. Ive 2023 lâi 30 000 eurod, mut ive 2024 rääjist Suáđikylá lii väridâm 50 000 eurod uásálistee budjetistmân. Tot lii juohhum sehe Suáđikylá siijdân et ucceeb sijdáid.
Uásálistee budjetistem lii Säämist lamaš kiävtust enâmustáá valastâllâm-fáddásijd čuosâttuvváid. Eres kieldâin ij lah kuássin lamaš meridum fáddá. Anarist lii taan ive vuosmuu tove.
– Juurdijm nuuvt, et puávtáččij leđe ihásávt mulsâšuvvee fáddá, moin uážuččijm talle kieldâlijn puorijd jurduid toos, maht täid fáádáid puáhtá ovdediđ, Korhonen lasseet.
