Velgupiettelendy tuou tuliele halličuksele miljardusiästöt. Parluamentupuolovehet ollah sovittu miljarduluokan siästölöis tuliele valličuskavvele. Tulii halličus jouduu leikkuamah menoloi libo ližiämäh tuloloi 8–11 (kaheksa – yksitostu) miljardua euruo, tovendau puolovehis kerävynnyh velgupiettelendyruadojoukko omas raportas. Kai puolovehet hurualistoliittuo čottah ottamattah ollah tavoittehes yhty mieldy. Tavoittehennu on painua julgizen talovuon alijiämiä 2–2,5 (kahteh – kahteh puolenke) prosentassah bruttokanzantuottehes vuodessah 2031 (kaksituhattu kolmekymmen yksi).
Halličus on suannuh parluamentan luottamuksen ruavolližustilandehtu koskijas välikyzymysiänestykses iänin 96–76 (yheksäkymmen kuuzi – seiččiekymmen kuuzi). Luottamusiänestys rodih keskustan da Liike Nyt -puolovehen jätetys välikyzymykses. Välikyzymyksen luadinuh oppozicii viärittäy halličustu ozittumattomas poliitiekas. Keskustan mugah halličuksen uskalmo suastuhandes uvves ruadokohtas on vaihtunuh Euroupan pahembah ruavottomuoh. Oppozicien mieles halličus on vai panendannuh ruavottomien ehtoloi da ližännyh köyhytty avvutandan sijah.
Suomespäi mulloi viettih rekordumiäry eläviä lehmiä ulgomuale. Žiivatois on maksettu ulgomual äijiä korgiembua hindua, migu kodimuas. Yhtelaigua lehmänlihas on Suomes vajavuttu. Luonnonvarakeskuksen mugah problieman keskes on olluh laukoin tahtottomus nostua lehmän jauholihan hindua.
Viemärilöin jiädymine tänä talven on olluh äijis kohtis poikkevuksellizeh suuri probliemu. Vijannu on vähälumine talvi, lujat pakkazet da niilöin täh roinnuh syvä jiädymine. Viemärilöin sulatusruaduo on olluh kaikenualazis kiindehistölöis: enimite omis koditalolois, ga sežo rivitalolois, tevolližuskiindehistölöis sego tahnuzis.
Ven’an suuren hyökkävyksen algavundas Ukrainah rodih tossargen nelli vuottu. Mustopäivän pidolois Kievas paikal oldih Suomen prezidentu Alexander Stubb da endine piäministru Sanna Marin. Yhtysvalloin välityksel mennyöt nevvottelut Ven’an hyökkävysvoinan loppemizekse ollah myösgi jiädy tuloksettah. Ven’a sanou, gu se jatkau hyökkävysty Ukrainas, kuni ei suavuta omii tavoittehii.
Yhtysvalloin prezidentu Donald Trump pidi tossargen kanzukunnan tilua kaččelijan paginan kongresale Washingtonas. Pagin keskityi enimite talovuoh da muahmuuttopoliitiekkah. Trump vihjai sežo Iranah, kudamua häi viäritti Yhtysvaldoissah piäzijöin ohjuksien kehitändäs. Prezidentu sežo čakkai korgevimua suuduo mennyt nedälin piätökses tovendua hänen azetetut hädätilatullit zakonattomikse.
Ylen lähetykset Milano-Cortinan olimpiiskolois talvikižois rikottih rekordua. Ylen olimpiiskoloin lähetykset tavoitettih televiizoras rekordumiärähizet 4,5 (nelli puolenke) miljonua suomelastu. Kaksis aijembis olimpiiskolois vastuaju miäry oli 4,1 (nelli pilku yksi) miljonua. Tämän kerran talvikižois suomelazien suvaittavembat lajit oldih hokkei, hiihto da hiihtoammundu.
Ylen karjalankielizile uudizile roih piätteniččän 11 (yksitostu) vuottu. Yle zavedii karjalankielizet lähetykset Pohjas-Karjalan radivos vuvvennu 2015 (kaksituhattu viizitostu). Yle uudizet karjalakse kuulutah nygöi Ylen Areenas. Sen ližäkse Yle julguau karjalankielizii uudizii verkos.