Kainuulazet kul’tuuru- da luondoruadajat ezitetäh Kalevalan kanzallispuuston perustandua Suomussalmen da Kuhmon päivännouzurajale.
Kymmene toimijua työndi kanzallispuustoaloittehen Suomussalmen kunnale piätteniččän. Myöhembä keräle tuli vie yksi uuzi yhtistys.
Kalevalan kanzallispuustoh kuuluttas ehoituksen mugah Murhisalon, Malahvian da Juortanansalo–Lapinsuon luonnonsuojelendualovehet, Yli-Vuokin bodrendusmeččy da Vienan maršruttu.
Ideju on elänyh meil jo aiga hätken. Toiči Kainuus unohtuu, gu meil on ainavoluaduine aloveh rajan lähäl, nenga sanou Vienan Veräjän paginanvedäi Anna-Leena Rauhala.
Ehoitetun alovehen lähäl sijaijah Suomen ainavot vienankarjalazet kylät libo Suomussalmen Hietajärvi da Kuivajärvi sego Kuhmon Rimpi. Net tuodas Rauhalan mugah ližäarvuo kanzallispuustole.
Ehoitetun kanzallispuuston kogonaine pinduala on läs 16 800 hehtuarua. Kogo aloveh on valdivon omistukses.
Kanzallispuuston perustandu on käytändös pitky processu da sih niškoi pidäy olla eričyszakon. Kanzallispuustoloi voijah perustua vai valdivon omistettavale muale da viele.