Boaldámušaid hattit leat čielgasit divron maŋimuš beivviid áigge ja dat dovdogoahtá jo olbmuid burssas. Dál 20 euroin illá fitne logi lihttera diesela, go vel moadde vahku dassái dainna oaččui nuppelot lihtera.
Boazodoalli Keijo Pirttijärvi Áŋŋelis dárbbaša boaldámuša biilii, mohtorgielkkáide ja traktorii. Son dadjá, ahte gal dat mihttáris jo dovdo garra boaldámušhaddi.
– Traktorboaldámušge máksá measta guokte euro lihtter ja justa válden 60 lihtter dange.
Pirttijärvi dadjá, ahte boaldámušhaddi ii goittot váikkut su vuodjimiidda.
– Bággu vuodjit. Dárbbašan fievrruide boaldámuša, de lea bággu oastit. Duššiidhan gal ii viša vuodjit, beare bargovuodjimiid.
Tauno Ljetoff Anáris bargá maid bohccuiguin. Dalle ii ábut smiehttat, man divrras boaldámuš lea.
– Leahan dat váigat, muhto go ferte oastit bensiinna, de ferte dasto seastit gos nu eará sajis.
Son ássá guovdu gili iige dárbbaš vealttekeahttá biila barmomátkiide, dainna sáhttá vehá seastit.
– Mun barggan ruovttus ja sáhttán vázzit Sajosii bargat.
Vesa Alander lei vuojašeamen mohtorgielkkáin. Son lei boahtimin Njuorggámis ja bisánii Anárii táŋket. Su mielas boaldámuš ii leat nu divrras velge.
– Máilbmi ii dainna gopmán. Muittán, ahte 2000-logu beallemuttus Čeavetjávrris mávssii bensiidna 2 euro lihtteris, muitala Alander.
Son ii olus vuoje biillain ja mohtorgielkkáinge oktii jagis moatte duhát reaissu. Dainna ii vel gefo menddo olu.
Anára Neste fitnodatdoalli Mikko Pirkola dadjá, ahte bensentáŋkkain hattiid divruma ii fuomáš. Olbmot táŋkejit nugo ovdalge.
– Mis lea dál alimus sesoŋŋa, bensena golaheami ektui eai leat dáhpáhuvvan nuppástusat jus veardida diimmážii. Dat gullo eanaš dušše ságain. Olbmot divrošit hattiid, muhto boaldámušaid vuovdimis dat ii oidno.
Boaldámušaid hattit badjánedje sakka dan maŋŋá, go USA álggahii soahtedoaimmaid Iranis. Ovddit háve boaldámušat ledje badjin dalle go Ukraina soahti álggii. Dalle diesel mávssii joba 2,50 euro lihtteris.
