Prezidentupuaru vastavui kuningas Charlesanke. Prezidentu Alexander Stubb da hänen mučoi Suzanne Innes-Stubb vastavuttih kuningas Charles III:nke (kolmandenke) Londonas tossargen. Vastavundu organizuittih, konzu kuningas oli käymäs suomelazien puupohjazien jogapäivähizen eloksen innovacieloin ozutteluh. Toizes pivos Londonas Stubb sanoi, gu häi on huolevunnuh Iranan voinan vaikutuksis Ukrainan tilandeheh. Prezidentu toivou, gu Iranan voinu ei siirrä bokkah huomavuo Ukrainan rauhannevvottelulois. Stubb tovendi, gu neftin hinnannouzendu elvyttäy Ven’an talovuttu da sen kauti avvuttau Ven’an voinukonehistuo.
Izrael on tappanuh Iranan turvalližusnevvoston johtajan Ali Larijanin. Izrael’an mugah Larijani kuoli iškus tossargen yöl. Häi ruadoi kaksi nedälii tagaperin tapetun Iranan korgeviman johtajan ajatollah Ali Khamenein nevvonandajannu. Izrael sanoi sežo, gu kolmanpiän se on tappanuh Iranan tiijusteluministran.
Bankukonsernu Nordea varustahes vähendämäh läs 1 500 (tuhattu viittysadua) ruadajua tänä da tulien vuon. Nordea tavoittelou vähimyölleh 150 (suan viijenkymmenen) miljonan euron jogavuodizii menovähendyksii vuvves 2028 (kaksituhattu kaksikymmen kaheksa) algajen. Nordean mugah syynny on ezimerkikse luja tehnolougienkehitys enne kaikkie azutus intellektas. Nordeal ruavos oli vuvvenvaihtos nenga 32 000 (kolmekymmen kaksi tuhattu) ruadajua, kudamis Suomes vajuat 6 600 (kuuzituhattu kuuzisadua).
Vai al nelläsvuitil ruavottomis on iellytykset suaja ruaduo terväh. Tämä tiijustettih Eloikeinoeloksen valduskunnan analiziiruičukses. Evan ruavottomuttu koskijan statistiekkuanualizan mugah kai 42 (nellälkymmenel kahtel) prosental ruavottomis on ylen jygei suaja ruaduo. Ruavottomus koskou enimite nuorii da lähivölöi. Suurembale vuitile ruavottomis yksi talovuskazvandu libo ruavon taričendua ližiäjät toimet ei tävvytä ruavonsuandas, nenga tovendetah Evan analiziiruičukses.
Kymmenet julgižuos tutut suomelazet naizet ollah puututtu seksualizien kuvaviärendöksien objektoikse. Ylen tutkii toimitus löydi saitan, kudamal juatah viärendettyy pornosyväindyö. Kuvua on nenga 1500 (tuhat viizisadua), da net on luajittu azutun intellektan vuoh. Yle tunzi kuvis 75 (seiččiekymmen viizi) suomelastu naistu. Heijän joukos on poliitikkua, sportuiččijua da ozuttelijua. Vuitti kuvien kohtehikse puuttunuzis naizis reknailou rikosilmoituksen luajindua.
Kanzalazien virguniekoilpäi suadavu poštu muuttuu enzisijahizesti sähköhizekse. Piätös tulou voimah tuliel kuul. Moizen virguniekkupoštan, kui ezimerkikse veropiätöksen libo iänioigevusilmoituksen suamine sähköhizesti iellyttäy kirjavundua suomi.fi (suomi čökeh fi)-poštujuaššiekkah. Se ei ole yhtelläh pakolline dielo. Bumuagahine poštu pyzyy endizelleh variantannu kaikile iellehgi. Vajuat kaksi miljonua suomelastu vie ei ole ottanuh käyttöh suomi.fi-viestilöi.
Karjalan Sivistysseuran 120 (sada kaksikymmen)-vuozipruazniekku korgenou Helsingis sulakuul. Piäpruazniekku pietäh suovattan 11. (yhtestostu) sulakuudu Valgies zualas Helsingin keskučas. Samazel nedälinlopul programmas on sežo Helsingin burgomistran Daniel Sazonovan ižändöittävy pruazniekkuvastahotto sego sugututkimusseminuaru. 120 (sada kaksikymmen)-vuozipruazniekan kunnivokse Helsingis pietäh sulakuul sežo luvendoloi karjalazes kuvataijos, kirjalližuos da muuzikas.