Sämimuseo Siijdâst lekkâs čáitáldâh, mii čáittá sämmilij digitaallâš spellâkulttuur ovdánem majemuu love ive ääigi. Diginatiiveh? Sämmiliih speelah tääl! - čáitáldâh čuákkee oohtân paijeel 40 spellâd, moi tuáváást láá lamaš paijeel čyeti ovdedeijed 20 enâmist.
Čáitáldâh oovdânpuáhtá sämmilii spellâovdánem ubâlâšvuođâ lyevdispeelâin almugijkoskâsávt miänástum digitaallâš speeláid. Čáitálduv kyesih pyehtih spellâđ viiđâ speelâ.
Proojeekt vuolgij joton Ucjuuvâst
Proojeekt vuolgij joton ive 2014 Ucjuuvâst, ko algii vuáváđ uđđâ iäláttâsâid arktâsâš kuávlun. Spellâpargopáájáin šoddâm haahâ lii tastoo vijđánâm aalmugijkoskâsâš ovtâspaargon.
– Paijeel čyeti olmožid láá skeŋkkim ääigis taan paargon já ráhtám speelâid, te muu mielâst lii uáli fiijnes, et pyehtip pyehtiđ taam pargo uáinusân, muštâl čáitálduv čokkim, pajasšoddâdemtiettuu tuáhtár Outi Kaarina Laiti.
Čáitálduvâst láá uáinimnáál sehe puđâldeijei rähtim demoh já áámmátlávt pyevtittum speelah, tegu aalmugijkoskâsâš huámmášume ožžum Skábma - Muotâčalme já Raanaa The Shaman Girl. Digitaallâš speelâi paaldâst láá meid lyevdispeelah já joba jiešrahtum spellâstivrimpiergâseh.
Totkee: spellâm kalga leđe hitruu
Totkee Outi Kaarina Laiti iätá, et sämmilâš spellâsyergi lii vala ovdánemmuddoost, mast puoh tääsih láá teháliih, sehe äigiájánâsspelleeh já áámmátlâš spellâpyevtittâsah.
Totkee mielâst iänááš uási sämmilijn speelâin vuáiju kielâ iäláskitmân, mii lii iberdettee šoddâdemulmij tááhust. Sun kuittâg käibid meid speelâid, maid spellâđ tuše hitruuvuođâ tiet.
– Ilo ij koolgâ leđe nuuvt kočodum luksuspyevtittâs. Jis smiättá, maggaar tiileest mij eellip maailmist tääl-uv, te ilo kolgâččij pajediđ vuosmužžân, sun suogârdâl.
Čáitálmâs lii tohhum Kone siättus Biokulttuurinen perintö ja ei-lineaarinen aika -haavâ torjuin.
Diginatiiveh? Sämmiliih speelah tääl! -čáitáldâh lii áávus 1.4–20.9.2026.
