Njávdáma guovllu olbmot leat moraštan iežaset gávppi buollima. Nord1market bulii meastaba gutnan lávvardateahket. Gádjunlágádus oaččui dieđu stuorra ráhkkanusbuollimis lávvardaga diibmu 19.25.
Čáskadandoaimmat biste sotnabeai iđit rádjai. Njávdámis leat doaibman guokte gávppi, mat leamaš bálddalágaid uhca gilážis. Dál gávpešillju lea unohas oaidnit: ovddeš gávppis eai leat báhcán go gunat ja boares galba gahččan vulos.
Njávdáma K-Market gávpejas Juha-Matti Lias mielde dat guoskkaha sakka olles giliservoša.
– Gal dat vehá ahkidis dovdu lea, go dat rievdada hui olu dán giliguovllu. Dákko leamaš goittotge diŋgojupmi guktuid rámbuvrraide. Go jurddaša dan gávpejaspára, geat dan gávppi jođiheigga, de das manai visot ovtta ijas, dadjá Lias.
Buollán gávppi, Nord1 Market eaiggát Jari Kekäle ii hálidan dán muttus searvat jearahallamii. Son goittotge árvalii Iltalehti-aviisii, ahte vahágat dán buollimis šaddet miljovnnaid euroid ovddas. Dušše beare buktagat ledje 800 000 euro ovddas.
Buollinsiva čielggadišgohtet
Dál Lappi gádjunlágádus ja Lappi boles čielggadit buollinsiva. Dutkamii manná goit máŋga beaivve. Buollán gávpi lei dehálaš maid norgalaččaide.
Vuossárga iđitbeaivve gávppiid šiljuin ii olu oidno huššá. Buollima maŋŋá lea šiljus dušše jaskatvuohta.
Buođggátlaš Bjarne Ingilä láve johtit Kirakkajávrris Njávdáma lahkosis go sus lea doppe iežas barta. Son lea guhká johtán gávppašeamen Njávdámis ja dálá dilli guoskkahii su olu.
– Dat lei issoras. Juohke háve go fitnat barttas, de fitnat gávppašeamen dán gávppis. Dat lea surgat daidda bártniide go masse diekkára.
Vuossárga iđitbeaivve gávpešiljus jorret muhtun olbmot govvemin gávppi gunaid. Gávpejas Juha-Matti Lias morašta dáhpáhusa.
– Gávpi lei doaibman duon sajis logiid jagiid. Gal buollin lea ain šohkka dáppe báikkálaččaid gaskkas. Ii oktage máhte dadjatge maidige, dadjá Lias.
Divvojuvvon 14.4.2026 diibmu 12:00 Nord1 Market eaiggát muitalii váhágiin Iltalehti-aviisii, ii Ilta-Sanomat-aviisii nugo ovdal muitaleimmet.
