Sámekulturguovddáš Sajosa parlameanttasáles álggii maŋŋebárgga iđđes Sámedikki dievasčoahkkin. Áššelisttus ledje dán háve čilgehus riikkabeivviide jagis 2025, bargoortnega ođasteapmis ja almmolašdoarjaga bušeahttaevttohus jahkái 2027.
Dán háve báikki ala Anárii eai lean boahtán go guokte áirasa, Anu Avaskari ja Aslak Pekkala. Earát geat čoahkkimii oassálaste, ledje gáiddusin dego ovdamearkan sadjásaš ságadoalli Tuomas Aslak Juuso ja várreságadoalli Leo Aikio. Nuoraidráđi ovddasteaddjin čoahkkimis lei mielde Ellen Saijets.
Sámediggi doaimmaha jahkásaččat čilgehusa sámiid guoski áššiin. Dat sáhttá sisttisdoallat maid evttohusaid sámiid vuoigatvuođaid ovddideapmái.
Bargoortnega sámediggi lea ođasmahttán vai dat vástidivččii ođđa sámediggelága sisdoalu. Ođasmahttin mielddisbuktá earret eará sámedikki bargoveaga namahusaid rievdadeami, ođđa lávdegottiid ásaheami ja maiddái ovdamearkan várreságadoalliid bargogovaid čilgehusa.
– Lunddolaččat sámediggelága dihte bargoortnega ferte dárkkistit ja árvvoštallat ođđasit. Maiddái resurssaid lasáhus gáibida dan, dadjá Sámediggeáirras Anu Avaskari dadjá.
Sutnje bargoortnegis deháleamos lei fuolahit, ahte anáraččaid ráđđádallangottis livčče bissovaš čálli.
– In evttot goittot ođđa virggi, muhto ahte dan divššošii seamma olmmoš olles válgabáji áigge, deattuha Avaskari.
Sámedikki stivra lei borgemánus 2025 ásahan bargojoavkku ođđa bargoortnega válmmaštallamii. Bargojoavkku jođiheigga ságadoallin Tuomas Aslak Juuso ja várreságadoallin Inka Musta.
Sámediggi evttoha boahtte jagi bušeahttan stáhtaráđđái 6 642 000 euro. Dán jahkái stáhta bušeahtas lea várrejuvvon 4 895 000 euro.
Divvojuvvon 14.4. dii. 20.05: Artihkkalis muitaluvvui boastut ahte Sajosii lei boahtán dušše okta áitosaš áirras ja nubbi livččii lean várrelahttu. Áitosaš áirasat báikki alde Sajosis ledje guokte, danne go Aslak Pekkala lea áitosaš sámediggeáirras iige várrelahttu.
