Kanzoinvälizen siirdolažusorganizacien IOM:n mugah nenga 7 900 (seiččietuhattu yheksäsadua) hengie kuoli mulloi muailman varattavil muuttomaršrutoil. Vaigu yhtel Välimerel kuoli da kadoi mennyt vuon enäm 2 000 (kahtutuhattu) hengie. Organizacien mugah siirdolazet jovvuttih käyttämäh varattavii da zakonattomii maršruttoi, sendäh gu turvallizien maršrutoin käyttöh ei olluh mahtuo. IOM on dokumentiiruinnuh piäl 80 000 (kaheksankymmenen tuhanden) siirdolazen kuolendua da kaduomistu vuvves 2014 (kaksituhattu nellitostu) algajen. Se vuadiu kiirehellizii toimiloi kuolendoin vähendämizekse.
Lendoyhtivö Finnairan tulos da liikehvaihto parattih alguvuvvel. Liikehvaihto kazvoi pakkas-kevätkuul piäl 12 (kahteltostu) prosental mullozes da oli läs 780 (seičendysadua kaheksuakymmendy) miljonua euruo. Finnairan mugah Iranan voinu ei ole nostanuh yhtivön poltoainehmenoloi, sendäh gu suurin vuitti sen poltoainehostandois on suojattu. Lähi-Päivännouzun aerodromoin vähennyh liikendeh on hyövyndännyh Finnairua da tuonnuh ližiä matkuniekkua Aazien-lendoloile.
Uvvenkaupungin autozavodu zavediu autobusoin sarjuluajindan. Valmet Automotive saneli kolmanpiän monivuodizes yhtesruadosobimukses litvalazen Carrus Deltan kel. Yhtivö luadiu diizel- da sähkökäyttöhizii bussoi Volvo Busesan kel. Tuotando Uvveskaupungis algavuu jo tänä vuon. Ruavolližusvaikutus on yhtivön mugah merkittävy, da zavodal ruavospäi työttylöi ruvetah hil’l’akkazin kuččumah järilleh.
Hartwall loppou Pepsin luajindan, myöndän da juandan Suomes. Hartwallan mugah sen yhtehine ruado PepsiCo-yhtivön kel lopeh vuvven 2028 (kaksituhattu kaksikymmen kaheksa) lopul. Pepsin ližäkse juomisvalličendah ollah kuuluttu ezimerkikse 7UP da Mountain Dew.
Suomen jevangelis-l’uteranskoi kirikkö uvvistau omassah kiriköllizet toimitukset. Kiriköllizih toimituksih kuulutah ezimerkikse ristindy, konfirmacii da venčaičendu. Kirikön tavoittehennu on huomavoija nygösty parem eriluaduzet eloksentilandehet da perehien monimuodožus. Uuzii malittukodvazii planiiruijah ezimerkikse puarueron, keskenmenon libo penziele lähtendän yhtevyöh.
Taijon akademiekku, tekstiil’utaidoilii Vuokko Nurmesniemi on kuolluh. Nurmesniemi tundietah Marimekon dizainerannu sego omas Vuokko-sobabrendas. Yksittäzis sovis kaikkii tundietumbi on Jokapoika-paidu, kuduan Nurmesniemi muodoili Marimekkoh niškoi vuvvennu 1957 (tuhat yheksäsadua viizikymmen seiččie). Äijän palkinduo suannuh Nurmesniemi jatkoi dizaineran ruaduo läs eloksen loppussah. Häi kuoli mennyt pyhänpiän Helsingis, konzu igiä oli 96 (yheksäkymmen kuuzi) vuottu.