Anára guovlu lea Lappi nubbin bivnnuhamos turismaguovlu. Dušše Roavvenjárga manná Anára ovddabeallái.
Olles Lappis turisttaid mearri lassánii mannan dálvve 4 proseantta, muhto Anáris lassáneapmi lei 12 proseantta, muitalit Business Finland dieđut.
– Suoločielggis lea sullii guokte goalmmátoasi idjademiin ja eara guovlluin Anáris fas sullii okta goalmmátoassi, muitala beaivválašjođiheaddji Hanna Kouri Lapland North Destinations -oasusfitnodagas.
Lapland North Destinations -oasusfitnodat lea Davvi-Lappi turismma guovloorganisašuvdna, man doaibmaguvlui gullet Anára ja Ohcejoga gielddat sihke Soađegili davveoassi.
– Anára turisttain badjel 90 proseantta leat olgoriikalaččat. Eanemus bohtet Stuorra-Britannias ja Fránkariikkas, muitala Kouri.
Maiddái Eanodagas turisttaid idjadeamit lassánedje 10 proseantta. Ohcejogas fas turisttaid idjadeamit geahppánedje 36 proseantta čielgá Business Finland dieđuin.
– Mii leat čuvvon eandalit allasesoŋŋa áiggis nappo juovlamánus 2025 guovvamánnui 2026, muitala áššedovdi Katarina Wakonen Visit Finlandis.
Visit Finland gullá Business Finland vuollái.
Ruhtageavaheapmi geahppánan turisttain
Vaikko idjadeamit leatge lassánan, de turisttat goittot leat geavahan unnánut ruđa mannan dálvve go ovddit jagiid áigge. Ruhtageavaheapmi geahppánii viđain proseanttain, dat njeijai 1,23 miljárdda euros 1,17 miljárda euroi.
Turisttat geavahedje unnit ruđa earret eará restoráŋŋa- ja suohtastallanbálvalusaide.
– Dan lassin leamaš maid ovdamearkka dihte erenomáš dálkkit degomat garra buollašat ja muohtaborgga, leat váikkuhan dasa, manin ruhtageavaheapmi lea uhccon, muitala Wakonen.
Kouri goittotge muittuha, ahte davimus Sámis eai turismaealáhus hálit geahččat dušše loguid ja rehkenastit dietnasa.
– Ferte heivehit turismma guovllu eará ealáhusaide ja suokkardallat dan, ahte nu ollusat go vejolaš ožžot ávkki turismmas. Mii geahččalat Anáris bargat ovttas earáiguin turismma ovddideamis, dego ovdamearkan fitnodagaiguin, Sámedikkiin, bálgosiiguin, Meahciráđđehusain ja dieđusge báikki ássiiguin, deattuha Kouri.
Lappis leat huksen buori vuođu turismii
Katarina Wakonen Visit Finlandis muitala, ahte turisttaid beroštahttá Lappis dat, ahte doppe lea turismaealáhus huksen buriid bálvalusaid.
– Lappi turismma bálvalusat ja beaggin lea erenomaš buorre. Turisttaid beroštupmi Lappii lassánan juohke jagi.
Davimus Sámis oidnet, ahte turismma sáhtášii ovddidit vel buorebun boahttevuođas.
– Galhan mis livčče vel vehá bargu oažžut sesoŋŋa álggu ja loahpa vuovdit buorebut, dadjá Hanna Kouri.
Son deattuha maid, ahte Anára guovllus eai hálit olles áigge lasihit turismma eandalit sesoŋŋa áigge, muhto ovddidit birrajagi turismma.
