Njávdáma gávppi Nord1-Market buollinsivva lea čielggaduvvon. Buollin oaččui álggu oalle sihkkarit beaivváššleađgarusttegis.
Boles lea čielggadan buollima siva das go buollimis šadde stuorra opmodatvahágat. Buollimis eai šaddan olmmošvahágat.
Buollinbáikki leat bolesa veahkkin bargan teknihkalaš dutkama maid gádjunlágádusa ja dáhkádusfitnodaga ovddasteaddjit.
Buollima álggus váldon govva- ja videomateriála vuođul buollima álgobáikki leat sáhttán oalle sihkkarit gávdnat. Dat leamaš nu gohčoduvvon boares oasi gávperáhkkanusas ja ođđa viiddiduvvon oasi sávnnjis. Dakko bokte leamaš earret eará beaivváššleađgarusttega dorvobotkkon.
Buollima jáhkehahtti cahkkehansivvan árvalit beaivváššleađgarusttega kabelerema dahje dorvobotkkona.
Gávperáhkkanus buollái lávvardateahkeda 11.4. Njávdámis. Gádjunlágádus oaččui dieđu stuorra ráhkkanusbuollimis lávvardaga diibmu 19.25. Lappi gádjunlágádus lei čáskadeamin buollima báikki alde ja esttii dan leavvamis eará ráhkkanusaide olles lávvardatija.
Čáskkadanbargguin gerge sotnabeaivve čieža áigge iđđes ja gádjunovttadagat vulge báikkis. Čáskkadanbargguide serve ovttadagat maid Girkonjárggas, Norgga bealde. Goaivunmášen lea sotnabeaivve bolton eatnama, amas dolla buollát ođđasis.
Nord1-Market gávpejas Juha Kekäle muitalii Iltalehti-áviisii buollima áigge, ahte gávppis visot leat buollán. Gávpejas árvalii, ahte vahágat buollimis šaddet miljovnnaid euroid ovddas. Dušše beare buktagat ledje 800 000 euro ovddas.
