Karjalan kielen opastusaineh pidäy enzimästy kerdua karjalan kielen opastandan da elvytändän kevätpäivän. Tapahtumu roih nellänpiän 28. (kahteskymmenes kaheksas) oraskuudu č 13–16 (kolmetostu – nellitostu), da sidä voit sebrata Päivännouzu-Suomen yliopiston Jovensuun kampuksel libo Zoomači. Kevätpäiväs ozutetah Päivännouzu-Suomen yliopiston karjalan opastukseh, tutkimukseh da elvytändäh liittyjiä aijankohtastu ruandua sego kerrotah ezimerkikse tutkimusprojektoin kuulumizii.
Perusškolan tavoittehii pidäy kebjendiä, gu kaikin voidas loppie školan, nenga sanou opastus- da kul’tuuruministerstvan ruadojoukko. Tavoittehennu on azettua opastundutuloksien heikkenendy da varmistua, gu jogahine nuori maltau perusnerot. Suomelazien školaniekoin maltotazo luvenduneros da matemuatiekas on heikennyh jo 20 (kahtenkymmenen) vuvven aijan. Ruadojoukko sežo vuadiu ližiä dengua perusopastukseh, sendäh gu Suomi on dengoitukses toizii Pohjasmualoi tagan.
Liftuyhtivö Kone on luadimas loppuh Suomen histourien kaikkii suurembua yrityskauppua. Kone on ostamas germuanielazen TK Elevatoran, kudai on kuigi Kone, yksi muailman johtajis liftu- da liuguporrasvarustajis. Kaupan arvo olis läs 30 (kolmiekymmendy) miljardua dollarua, konzu keräle čotaijah sežo vellat. Yrityskaupan jälles Kone-yhtivös rodies muailman suurin liftuyhtivö. Yhtistymine roih vikse ei aijemba vuottu 2027 (kaksituhattu kaksikymmen seiččie). Ližäkse yhtistymine iellyttäy vie paiči muudu virguniekkulubii. Tässäh Suomen suurin yrityskauppu on olluh Nokian da Alcatel-Lucentan yhtistymine vuvvennu 2015 (kaksituhattu viizitostu). Nokia osti francielas-amerikkalazen tiedoliikendehyhtivön 15,6 (viijentostu pilku kuvven) miljardan euron hindah.
Nenga 3 000 (kolmetuhattu) hengie kiinnostui hengilötiijusteluruavos, kudamah pidi ven’an libo kitain kielen maltuo. Suomen turvalližuspolicii SUPO pani rattahile kampuanien uuzien ruadajien ečindäh niškoi kevätkuul. Moine kampuanii kiinnitti äijien mieldy. Ilmoitustu vakansieloih näh oli pandu joukkoliikendeheh da eriluaduzih lehtilöih. Sih niškoi oli tiijoitannuh sežo Yle. Pakičuksii otettih vastah vaigu poštači, gu nimittumua sähköhisty jälgie ei olis jiännyh. Pakičukseh pidi liittiä täytetty ankiettu da mustopuikkozele pandu video. Videos kandiduatoile pidi analiziiruija omii toimiloi mintah mahtollizen varattavan tilandehen roites.
Joga nelläs nuori on ajanuh sähköpotkulavval humalas vähimyölleh kerran. Dieloh näh tiijustettih Liikendehturvan 15–24 (viizitostu – kaksikymmen nelli)-vuodizile luajitetus kyzelyspäi. Nelli viijes vastuajas yhtelläh kannattau promillerajua sähköpotkulaudailuh. Mulloi kezäl tuli voimah 0,5 (nol’an pilku viijen) promillen raja. Päihtynyönny ajandas roih 200 (kahtensuan) euron liikendehhairavomakso. Kullettajal igiä pidäy olla vähimyölleh 15 (viizitostu) vuottu, da šleman käyttyö nevvotah. Kaksi kolmes vastuajas pidäy šleman käyttyö tärgienny. Nenga joga nelläs nuoris duumaiččou, gu sähköpotkulavvale voit ottua kyydih matkuniekan, hos se ongi kielletty.