Suomi.fi neahttabálvalus lea dál rahpasan maiddái golmma Suomas hállojuvvon sámegillii. Dat lea Digi- ja álbmotdiehtodoaimmahaga buvttadan neahttasiidu, masa leat čohkken buot Suoma almmolaš hálddahusaid bálvalusaid, áššiid dikšun kanálaid ja eará dieđuid.
Bálvalus veahkeha ja oahpista álbmotlahtuid árgabeaivvi áššiid dikšuma eiseválddiiguin, sihke bagada geavaheaddji sámegielat áššiid dikšumii earret eará Álbmotealáhatlágádusa ja Lappi buresveadjinguovllu siidduin.
– Dat lea buorre ja stuorra lávki ovddosguvlui. Leat ožžon dakkár rámma, man sisa mii beassat čohkket buot bálvalusaid mat leat sámegillii, muitala Digi- ja álbmotdiehtodoaimmahaga áššedovdi Nina West.
Sámegielat siidduid duohkin leat eaktodáhtolaš Mii ovttas -fierpmádat, masa gullet virgeoapmahaččat ja Sámediggi. Ulbmilin lea lasihit sámegielat bálvalusaid ja maiddai movttiidahttit sámegielagiid geavahit dáid bálvalusaid iežaset gillii.
Sámedikki sátnejođiheaddji sadjásaš Tuomas Aslak Juuso illuda dán ovttasbarggus.
– Dat lea dehálaš lávki, man leat ovttasráđiid ovddidan, vai šattalii albma láhkai nu, ahte sápmelaččain lea vejolašvuohta ovtta sajis gávdnat sámegielat bálvalusaid, ja ahte dat livččii bures koordinerejuvvon ollisvuohta, dadjá Juuso.
Bálvalusat lasihuvvojit áiggi mielde
Sámegielat sisdoalut almmostahttojuvvojit gulul ja bálvalusa viiddidit vehážiid mielde.
– Doppe šaddet áiggi mielde eambbo ja eambbo bálvalusat, ahte dat lea muhtun ládje álgu, masa leat bidjan daid bálvalusaid, mat leat juo fidnemis. Sávvat, ahte virgeoapmahaččat ja organisašuvnnat bijale sin iežaset sámegielat bálvalusa dohko oidnosii, dadjá Nina West.
Ulbmilin lea, ahte iešguđet organisašuvnnat vuolggášedje mielde almmustahttit dieđuid iežaset bálvalusain sámegillii.
– Juohke bálvalusa lea dehálaš oažžut oidnosii dohko oktasaš báikái, oaivvilda West.
Seammá sávvá maid Sámedikki sátnejođiheaddji sadjásaš.
– Dieđusge olu lea gitta maid virgeoapmahaččain, ahte sii servet dán bargui ja vulget lasihit dieđuid iežaset buohta, deattuha Tuomas Aslak Juuso.
Suomi.fi bokte virgeoapmahaččat sáhttet maid sáddet ságaid njuolga geavaheaddjiide. Bálvalusa sáhttá giđa mielde váldit atnui golmma sámegillii.
Maŋŋelabbos ulbmilin lea almmustahttit maid mobiilaapplikašuvnna sámegielaide.
