Ven’alastagalaine helsingiläsgimnuazielaine Aleksi Laitinen on kirjutannuh yliopastujien koittehis 14 (nellitostu) laudaturua. Se on kaikkien aijoin rekordu. Aijembi rekordu on vuvvel 2016 (kaksituhattu kuuzitostu), konzu mikkeliläine yliopastui kirjutti 12 (kaksitostu) laudaturua. Aleksi Laitinen tahtou pyrgiekseh opastumah sähkötehniekkua Aalto-yliopistoh, ga reknailou sežo opastundua ulgomual. Ezmäi häi yhtelläh kävyy armieh.
Ulgomualastagalazien nuorien syrjindykogemukset ollah ližetty. Tervehyön da hyvinvoindan laitoksen školatervehyskyzelyn mugah piäl puolet ulgomual roinnuzis kaheksas- da yheksäskluassalazis sanotah, gu heidy on syrjitty libo kiuzattu školas libo joudoaijal. Erot suomelastagalazien da ulgomualastagalazien nuorien välil ollah kazvettu äijis suuris linnois. Pahembat miärät lövvytäh Lahtes.
Halličuksen azetettu sellitysjoukko ehoittau muutoksii lapsiližäsistiemah. Ehoitetus mallis jogahizes lapses maksettas yhtenjyttyine lapsiližä, ga nygöi ližän miäry nouzou perehen lapsien miärän mugah. Ruadojoukko ehoittau sežo lapsiližän maksandua 18 (kaheksatostu)-vuodizessah. Sellitys roih tuliel halličuskavvel.
Liikundu-, sportu- da nuorižoministru Mika Poutala ezittäy, gu Suomes otettas käyttöh Brituanien mallin jyttyine tabakan ostandukieldo nuorile. Poutala planiiruiččou panna dielon rattahile vie tämän halličuskavven aigua. Poutalan mugah dieluo smietitäh ezmäi sociali- da tervehysministerstvas vastuajien ministroinke. Poutalan ehoitetus mallis vuvvennu 2009 (kaksituhattu yheksä) da sen jälles roinnuot ei voija nikonzu ostua tabakkutuottehii.
Halličus on ližännyh Andes-hantaviirusan täh roittavan tavvin ylehisvarattavien tartundutaudiloin luvetteloh. Ukuazumuutos andau mahtuo ezimerkikse herkennyzien ristikanzoin panendah karantiinah. Ukuazumuutoksen taga-alal on hollandielazel matkailulaival Andes-viirusan täh roinnuh epidiemii. Voimattomis kolme on kuolluh. Vie ei ole tieduo, gu tartundua olis Suomes.
Mediiyhtivö MTV on riiččinyh juandusobimukset Elisa-tiedoliikehyhtivön kel. Sen periä MTV:n ilmazet kanualat enämbiä ei nävytä Elisan kuabeli-TV:s da Elisa viihties kolmaspäiväs algajen. MTV:n maksottomii kanualoi ollah MTV3, MTV Sub da MTV Ava. Elisan mugah kanualoin pimenendy koskou läs 800 000 (kaheksuasadua tuhattu) koditalovuttu.
Suomi on piässyh Euroviizuloin finualah. Linda Lampenius da Pete Parkkonen evustetah Suomie pajol Liekinheitin. Ozutus sai enzimäzes puolifinualas Wienas tossargen rahvahalpäi suuret aplodit. Ozutus on yksi viizuloin voittajakse ennustettulois. Euroviizuloin toine puolifinualu roih nellänpiän da finualu suovattan.
Ilomantsin Mieslaulajat -hora pidäy kezäl da tulien sygyzyn karjalankielizen konsertukierdovehen. Hora pajattau suomelazii iškelmii da pop-pajoloi karjalan kielele kiännettylöinny. Vuvvennu 1948 (tuhat yheksäsadua nellikymmen kaheksa) perustetun mieshoran pajatettavat kuulužat pajot on kiännetty livvinkarjalakse. Konsertat roitah kezäkuul Jovensuus sego syvyskuul Ilomančis, Heinyviel da Helsingis.