Boazoparlameanta lea buot boazodoalliid oktasaš dáhpáhus ja dasa sáhttá oassálastit, ná celket Sámi bálgosat -searvi ja Bálgosiid ovttastus oktasaš dieđáhusas, mii lea almmustuvvan Facebookas.
Organisašuvnnat ja 35 bálgosa ovddasteaddjit leat mannan vahkus deaivvadan Levis ja deaivvadeamis badjánii ságastallamii nuoraid fuollas das, ahte Boazoparlamentii oassálastin livčče boastut.
– Min nuorat vásihit dálá dili lossadin ja sis lea unohas dovdu das, ahte sáhttetgo vuolgit skuvlamátkái Boazoparlamentii, muitala ságadoalli Tiina Sanila Sámi Bálgosat -searvvis.
Sanila hálida deattuhit, ahte guktuid organisašuvnnaid mielas lea dehálaš, ahte nuorat ovttastallet ja oahpásmuvvet eará guovllu boazodoalliide.
Maiddái Bálgosiid ovttastusa ságadoalli Matti Riipi sávvá, ahte buot boazodoallit dovddašedje oadjebassan oassálastit Boazoparlamentii.
– Mii hálidat muitalit, ahte buohkat leat buresboahtán dáhpáhussii. Juohke bálggus dieđus ieš mearrida oassálastágo, muhto ovttaskas boazodoallit ja eandalit nuorat doaivvu miel dovdet, ahte sáhttet boahtit.
Ášši duogážis lea dat go jagi 2023 Boazoparlameanttas 11 sámi bálgosa guđđe Bálgosiid ovttastusa jahkečoahkkima. Sámebálgosat eai lean dalle duhtavaččat ságadoalliválljejupmái, go Matti Riipi válljejuvvui ságadoallin. Bálgosiid mielas Bálgosiid ovttastus ii ovddit sámebálgosiid áššiid.
Buorre gulahallanoktavuohta organisašuvnnaid gaskkas
Sanila muitala, ahte Sámi bálgosat -searvvis ja Bálgosiid ovttastusas lea buorre gulahallanoktavuohta.
– Mii leat hui dávjá oktavuođas. Leat jo moddii dán jagi deaivvadan ja háleštan dán dili birra. Jáhkán, ahte áiggi mielde mii oaidnit mo dás geavvá.
Riipi dovddasta, ahte dilli ii leat álki, muhto hálida jáhkkit, ahte boahttevuođas dat buorrána.
– Sávan, ahte beassat ovddosguvlui dáinna áššiin ja ahte boahttevuođasge boazodoalus leat buorit vejolašvuođat ceavzit. Ja eandalit nuoraid buohta, ahte sii sáhttet joatkit boazodoalus.
Boazoparlameanta lágiduvvo 1.–2.6.2026 Roavvenjárggas. Dán jagi teman lea ”Boahttevuohta: Hukset ovttas birgema eavttuid boazodollui ja dahkat vejolažžan ealáhusa nuorat buolvvaide olles boazodoalloguovllus”.
Molsašuddi doaibmanbirrasis boazodoalliid deaivvadeamit ja oktavuođaid čatnan lea dehálaš, cealká Bálgosiid ovttastusa doaimmajođiheaddji Hanna Nurmi.
– Ovttas mii leat gievrrabut ja ovttas mii sáhttit hukset boahttevaš buolvvaide bistevaš ja gánnáhahtti ealáhusa.
Rievdaduvvon 21.5.2026 diibmu 11.11: Álggos bajilčállosis muitaluvvui, ahte Sámi Bálgosat -searvi ja BO ávžžuhit buohkaid oassálastit Boazoparlamentii. Dárkkálmahtton ahte dat hálidit movttiidahttit eandalit nuoraid oassálastit.
