Tramvait tullah järilleh Turrun uuličoile. Turkuh srojitah raiživotie. Turrun linnavaldivosto piätti dieloh näh ezmässargen ehtäl. Pagin on Turrun histourien suurembas investiiruičendas, kudaman arvo on enäm 500 (viittysadua) miljonua euruo. Projektan todevundan ehtonnu on, gu valdivo maksau vuitin menolois. Todevujes raiživoliikendeh algavus Turrus sygyzyl 2033 (kaksituhattu kolmekymmen kolme).
Parluamentan puolistusvalličendukundu vuadiu uvven varavotiijoitehsistieman käyttöhottuo mahton mugah teriämbäh. Puolistusvalličendukundu kaččeli mennyt piätteničän varavotilandehtu, kudamas Uvvenmuan eläjii kehoitettih suojuamahes syväintiloih lähenijöin drounoin täh. Nygöine 112 (yksi yksi kaksi)-sobivutus ei tavoitannuh kaikkii eläjii. Suomeh on tulemas moine sistiemu, kudamas tiedo varavotilandehih näh tulou telefonan ekruanale rippumattah verkoyhtevyksis libo telefonan azetuksis. Syväinaziiministran Mari Rantazen mugah sistiemu otetah käyttöh enne vuvven loppuu, ga valličendukundu pidäy nečidä liijakse hil’l’annu.
Syväinaziiministerstvan pellastusvirguniekku on tävvendännyh kanzalazih niškoi luajittuloi ohjavoloi drounuvaravos vakustamizes da varavotiijoitandas. Pellastustoimi nevvou lad’d’uamah 112 (yksi yksi kaksi)-sobivutuksen da pagizemah lähäzienke edukyndeh sih näh, midä pidäy ruadua varavotilandehes. Pellastustoimi kehoittau sežo sellittämäh ruavonandajal, kui toimitah varavotilandehes. Ohjavot lövvät pelastustoimi.fi-saital.
Gimnuazielazien miäry vähenöy jyrkäh. Kunduliiton gimnuaziisellityksen mugah vuodessah 2040 (kaksituhattu nellikymmen) gimnuazielazien miäry vähenöy piäl 20 (kahtelkymmenel) prosental. Äijil pienil paikkukunnil opastujien miäry vähenöy äijiä enämbäl, migu Helsingis. Sen periä gimnuaziet monil paikkukunnil salvatah.
Kainuun Muzei sai mennyt nedälil Sotkamos löyttylöi kivikaudizii ezinehii madalan vien pal’l’astamal rannalpäi. Ezinehet löyttih lapset kižates-elostajes rannal. Kainuun Muzein mugah lövvöt ollah kivikaudizet brujat, kovažin da kivikirves. Muzeis sanotah, gu löydö on harvinaine. Ezinehet ollah ozutettavinnu Kainuun Muzeis kezän aijan.
Kolmenkymmenen lämböastehen raja on rikkovunnuh enzimäzen kerran tänä vuon. Ilomančis kolmanpiän miärättih 30,2 (kolmekymmen pilku kaksi) astehtu lämmiä. Loppunedälis yhtelläh siäennustuksis on muuttujua da vaihtelijua ilmua.
Da sanelemmo vie sih näh, gu Ylen karjalankielizil sivuloil olijat uudiskirjutukset nygöi voit sežo kuunnella. Kirjutukset ollah kuunneltavinnu niilöin allus olijan kuundelendupainikkehen vuoh. Konehiäni lugou uudizet livvinkarjalakse. Enne nečidä kuundelendumahto on olluh Ylen suomen- da ruočinkielizil sego jälgimäzikse sežo saamenkielizil uudissivuloil. Azutun intellektan avul luajitun palvelun tarkoituksennu on tugie vähembistökielien säilymisty da suavutettavuttu.