Taʹnni õhttsažooccmest pueʹtte jiânnai ooccmõõžž nuõrttsääʹmǩiõl määttaid.
Nuõrttsääʹmǩiõl universiteʹttuʹčteeʹl Miika Lehtinen mušttal, što joba čiččmõs leʹjje piijjâm Oulu universiteeʹtt sääʹmǩiõl määttaid vuõssmõs vaʹlljummšen.
Õhttsa 11 leʹjje ooccâm määttaid.
– Jeäʹp kâʹl vuârddam nuʹtt jiânnai, mušttal Lehtinen.
Universiteʹttmäätt siõm ǩiõʹlle lie õinn võõrâs äʹšš, jie-ǥa määŋgas leäkku veâl tõid čõõđtam.
Sääʹmǩiõl määttaid iʹlla ni leämmaž vueiʹtlvaž ooccâd juõʹǩǩ eeʹjj. Sääʹmǩiõl universiteʹtt-tääʹzz vueiʹvvaaunâsmäätt aʹlǧǧe eeʹjj 2020 da tõn mâŋŋa määttaid lij piâssâm ooccâd tåʹlǩ måtam vuâra.
Ââʹn määtt leʹjje eʹpet ooccâmnalla da ooccji meäʹr diõtt vuäǯǯ rämmšed.
– Tõt lij tuõđi šiõǥǥ miârkk, ko lij nuʹtt jiânnʼjõs ooccâm. Leäʹp teâđast tuõđi räämmast, leâša tõʹst âlgg veâl peäggted, što tõt ij veâl miârkkšõõv tõn, što puk väʹldde vuâstta tõn pääiʹǩ, mušttal Lehtinen.
Ouddmiârkkân teimma tåʹlǩ õhtt oocci vaaʹldi universiteʹttpääiʹǩ vuâstta. Pueʹrmõs eeʹjj leʹjje koolmâs, kook vaʹldde vuâstta mättʼtõõttâmpääiʹǩ.
Sääʹmǩiõl määttaid jie leäkku teänab ni sizzpiâssâmteeʹst. Lehtinen mieʹldd universiteeʹttest lie veerǥlânji nellj altteempääiʹǩ, leâša jõs puârast ǩeävv, vuäiʹtte puk 11 oocci vuäǯǯad pääiʹǩ.
Lehtinen mieʹldd täʹst õõudårra nuõrttsääʹmǩiõl määttaid vuäitt ooccâd takainalla juõʹǩǩ eeʹjj, håʹt-i tän räjja vueʹǩǩ lij vaajtõõllâm.
– Kâʹl mon joordam, što mij vueiʹttep väʹldded pukid, ko ij-han tõt leäkku jeäʹrmm, ko jeäʹp tieʹđ, jõs pueʹtti eeʹjj ij puäʹđ ni ǩii. Kâʹl leäm fiʹttjam, što vueiʹttep väʹldded pukid.
