Duodji Akademiija 2027 -prošeakta lea doaibman mannan čavčča rájes ja dál prošeavtta olis lea farga vuosttas seminára. Duodjeseminára ordnejuvvo geassemánu 13. beaivve Heahtá skuvllas. Seminárii sáhttá oassálastit maiddái gáiddusin
Seminára vuodju duodjeárbevieru seailluheapmái ja sirdašuvvamii sohkabuolvvaid gaskkas Eanodagas, Guovdageainnus ja Ruoŧa beale Gárasavvonis, muitala plánejeaddji Birit Tornensis Gilbbesjávrris.
– Semináras mii ságastallat das makkár lea árbevirolaš duoji dilli dál Eanodagas, Ruoŧa beale Gárasavvonis ja Guovdageainnus. Sirdašuvvágo dat duodjemáhttu buolvvas nubbái. Mii geahččalat hutkat ideaid, mot sáhtášii buoridit dili dieid guovlluin, čilge Tornensis seminára sisdoalus.
Fitnu konkrehta doaibman lea earret eará ráhkadit doaibmaplána das, mo hukset ehtalaš rávvagiid sámeduoji buvttadeapmái ja vuovdimii.
Heahtá semináras álgáge dat bargu, ávnnasteami oktavuođas.
– Mii viežžat sieđggaid, faskut osttuid ja vuollat bárkkuid. Seammás álggahat ságastallama mot ráhkadit ehtalaš rávvagiid duddjomii, duoji vuovdimii ja geavaheapmái.
Fitnu áigge ordnejit njeallje seminára, main vuosttas lea Heahtá seminára. Fitnu lea mielde maiddái Ohcejogas, KulturSápmi dáhpáhusas. Ohcejogas ságastallet duodjeetihkas 18.6.
Garraduoji duojárat unnán
Dál go Tornensis lea jearahan duojáriid seminárii, son lea fuomášan ovtta duodjesuorggi, mas leat unnán duojárat.
– Dat lea goit boahtán ovdan, ahte eai soaitte juohke guovllus leat šat dat garraduojárat. Diet lea boahtán ovdan, go lean geahččalan jearahit olbmuid boahtit seminárii.
Heahtá duodjeseminárii galgá almmuhit iežas fárrui, jus manná báikki ala. Maŋimuš almmuhanbeaivi lea gaskavahku, miessemánu 27. beaivve. Dilálašvuohta lea čujuhuvvon duojáriidda, duodjeberošteddjiide, nuoraide ja duodjeorganisašuvnnaide Suoma, Norgga ja Ruoŧa bealde. Earenomážit čuozáhatjoavkun leat Eanodaga, Guovdageainnu ja Gárasavvona guovllu sámit.
Prošeakta ollašuhtto Suoma ja Norgga Sámedikkiid ovttasbargun, ja dan ruhtada EU Interreg Aurora -prográmma.
