Anára Njávdámii huksejit ođđa gávppi cuoŋománus buollán Nord1-Market sadjái.
Gávpejaččat Juha ja Jari Kekäle nanneba, ahte plánat leat ovdánan tevdnen- ja plánenmuttu gilvalahttimii.
– Gal dasa boahtá ođđa ráhkkanus nu jođánit, go fal lea vejolaš časkkit guohki eatnamii, Juha Kekäle muitala.
Gilvalahttima maŋŋá áigot ohcat huksenlobi Anárá gielddas.
– Gielddas muitalit, ahte dahket jođáneamos mearrádusaid Suomas dákkár áššis, boagusta Kekäle.
Ođđa ráhkanus šaddá sullii 1200 njeljjehasmehtera, nappo sullii seamma stuoris go maid gávpi lei ovdal.
Norggas ja Mátta-Suomas sáddejedje movttidahtti dieđuid
Gávpejaččat leaba ožžon iežaska rehkegiid mielde jo masá duhát teakstadieđu, main olbmot sávvet ođđa gávppi.
– Buot dain dieđuin gili olbmuin ja gitta Mátta-Suomas lea leamašan sávaldat, ahte deike galgá ođđa gávppi.
Stuorámus oassi dieđuin lea boahtán Norggas. Vieljjažagaid gávpi geasuhii aššehaččaid ovdamearkka dihte viđa miilla geažes Girkonjárggas.
– Gávpi lei duos sullii 40 jagi, munnos leat fuolkkit Davvi-Norggas. Gávppishan moai letne oaidnán singe, dál lea nu ártet go fuolkkit galleditge ruovttus, čaimmiha Jari Kekäle.
Gávppi gaskalduhttinge lea daid áiggiid finihan su mielas.
– Dán leat bargan golmma buolvvas. Lean muhtumin smiehttan, ahte dásago dat nogai.
Norgga rádjegávpi Nord1-Market bulii gutnan cuoŋománu 11. beaivve. Polesa dutkama vuođul buollin álggii jáhkkimis beaivváššleđgarustegiin.
