Lappi buresveadjinguovlu lea almmuhan, ahte Ohcejoga ruovttubuohcceviessu lea giddejuvvon miessemánu álggus gitta borgemánu lohppii. Buresveadjinguovllu guovloráđđehus gieđahalai ruoktobuohcceviesu geasseáigge giddema čoahkkimisttis 25.5.
Ruoktobuohcceviesu giddema áigge lágiduvvo áššehasaid dikšun spiehkastatordnemiiguin. Áššehasat rávvejuvvojit ovddemusat Ohcejoga dearvvasvuođaguovddáža vuostáváldinbálvalusaide, gos árvvoštallojuvvo divššu dárbu ja lágiduvvo joatkkadikšu.
Hohpolaš diliin dikšun dáhpáhuvvá Avvila dearvvasvuođaguovddáža gohcimis. Dárbbu mielde buohccit rávvejuvvojit maiddái Avvila seaŋgaossodahkii joatkkadikšui.
Ohcejohkalaččat fuolas
Ohcejoga gielddahoavda Päivi Kontio lea fuolas, mo gieldalaččat ožžot veahki geasi áigge, go buohccedivššárbálvalusat eai leat olamuttus eahkes ja vahkuloahpain.
– Jos ovdamearkka dihtii lea olmmoš, gii dárbbaša oanehisáiggi antibiohtahávvedikšuma njuolga sutnii vahkuloahpas, de dakkár bálvalusa ii fidne Ohcejogas.
Su mielas ii leat govttolaš, ahte dál geassit olbmot gártet ohcalit gitta Avvilii dearvvašvuođaguovddážii vai ožžot veahki.
– Lagašbálvalusaid leat lohpidan ordnet, muhto gal dát lea oalle guhkkin lagašbálvalusas, dadjá Kontio.
Ohcejohkalaš táksevuoddji Mikko Järvensivu smiehtada mo gieldda boarrásut olbmot birgejit geasi badjel.
– Dáppe gielddas leat olu measta 90-jahkásaččat, geat orrot vel iežaset ruovttuin. Jus ruovttubuohcceviesu doaibma lea giddejuvvon, de gos sii ožžot veahki, jus ii dárbbaš áibbas ámbulánssa riŋget báikki ala.
Son muitala, ahte boarrásat lávejit muhtimin riŋget oahpes táksevuoddjiide go šaddá heahti, go eai dieđe šat gosa eará sadjái galggašedje váldit oktavuođa.
Doaibma joatkašuvvá čakčat
Viggamuššan lea álggahit doaimma ođđasit čakčamánus 2026, dieđihit Lappi buresveadjinguovllus.
Ohcejohkii leat aiddo rekrytereme bargiid, muitala buresveadjinguolvu dieđáhusasttis. Viggamuššan lea gávdnat namalassii buohccedivššára ruovttudivššu ja ássanbálvalusaid bargiid jovkui, mii lea eaktun bálvalusaid gillilis dorvvasteapmái ja ruovttubuohcceviesu doaimma ođđasit álggaheapmái.
Buresveadjinguovllu guovloráđđehusa mearrádusas máinnašuvvo, ahte rabas virggit leamaš dán giđa áigge guktii ohcanláhkai. Maŋimuš rekryteremis bohte guokte ohcamuša. Ovddit ohcciin oktage ii lean gárvvis álggahit barggu dál miessemánu áigge, muhto baicce easkka čakčat.
