Helsingin tulipalo kerrostalois rodih galdarin guazugrillis. Täl nedälil virguniekat ollah jatkettu Helsingin Kalasataman suuren kerrostaloipalon tutkindua. Policien arvivon mugah suovattuehtän tulipalo rodih nelländen kerroksen galdarin guazugrillis. Palo levii ylen terväh taloin levorakendehih suurele alovehele. Piäl puolet taloin eläjis ollah löytty uvven koin, ga kohendusruavot viijäh äijän kuudu. Arvivoijah, gu talovehellizet vahingot nostah vähimyölleh miljonoih euroloissah.
Kilbu- da kuluttajanvirrasto on pal’l’astannuh muarjualan kartel’an. Viizi Suomen suurembua luonnonmuarjuyhtivyö on sobinuh keskenäh keriäjile maksettavis dengois. Ostokartel’an vuoh yhtivöt ollah voidu maksua muarjuniekoile vähembän dengua. Sen ližäkse buolan, must’oin da muur’oin hinnois on vaihtettu tieduo yrityksien keskes. Kilbu- da kuluttajanvirrasto ezittäy muarjuyhtivölöile kaikkiedah 9,4 (yheksän pilku nellän) miljonan štruaffuu. Muarjukartel’u on ruadanuh kymmene vuottu.
Ruavottomus on pyzynyh Suomes iellehgi korgiel tazol. Ruavottomusastehen trendumiäry oli sulakuul 10,6 (kymmene pilku kuuzi) prosentua, mi on vuvven korgevin lugemu. Ruavottomus on ližennyh kaikis igäjoukkolois. Ruavottomua ruavoneččijiä oli sulakuun lopul 20 000 (kahtukymmendy tuhattu) enämbi, migu vuozi tagaperin. Sežo avvonazien ruadosijoin miäry on vähennyh. Niilöi oli sulakuul läs viijesvuittii vähembi, migu mulloi.
Suomi vois suaja äijiä nygösty enämbän kezäturistua, nenga sanou matkuandan eistämisjärjestön Visit Finlandan johtai. Suvizembas Euroupas jo nygöi oraskuul on olluh ylen räkki, da pohjazes löydys vilumbastu kohtua. Suomen kozuriloi matkuandas ollah luonnolližus, ozakkahus da luondo. Enäm muidu Suomeh kezäl tulou germuanielastu, ruoččilastu da eestilästy matkuniekkua.
Karjalazet Nuoret Suomes – Karjalaiset Nuoret Šuomešša -yhtistys pidäy Jovensuus pyhänpiän 7. (seiččemes) kezäkuudu karjalankielizen pläšindypivon. Bes’odu-tapahtuman kaikkih kižoih da pläšindöih opastetah, da opastandukielenny on karjala. Pido roih 16–40 (kuuzitostu – nellikymmen)-vuodizih niškoi.
Tamberel sežo kezäkuul piettäväl Finlayson Soi -festivualil roih kaikile avvonastu karjalankielisty programmua. Festivualile tulou pajattamah piätteniččän 12. (kahtestostu) kezäkuudu karjalankielisty muuzikkua luadii Loimolan Voima -yhtyveh. Sen ližäkse programmah kuulutah Soita da pajata -starinkonsertu da suovattan 13. (kolmastostu) kezäkuudu piettävy karjalankieline paginperti.
Kuusamos pietäh elokuul karjalastu kul’tuuruperindyö kaččelii Tie Vienah -simpouziumu. Tapahtumu koskehes ainehellizen da ainehettoman perindön da perindehen ihaloičendah da kibielöih kohtih. Karjalan Sivistysseuran da Kuusamo-opiston organizuittavu tapahtumu pietäh 28.–30. (kahteskymmenes kaheksas – kolmaskymmenes) elokuudu.
Da sanommo vie, gu Ylen karjalankielizet uudizet jiäjäh nygöi kezäpauzale. Tulemmo järilleh elo-syvyskuun vaihtos. Čomua keziä kaikile!