Vuosmuš luuhâmihe Oulu ollâopâttuvâst lii nuuhâm já 21-ihásâš Ruut Tervaniemi lii algâttâm kesipargo päikkisiijdâst Anarist.
Tervaniemin ristâlâš osko lii eellim kuávdáást já Oulust sun lii peessâm feeriđ taggaar moos ij lah Anarist hárjánâm.
– Mun lam iällám Oulust uáppeid tárguttum ristâlâš ehidijn, te lam uážžum uáiniđ eres ristâlijd nuorâid.
Ristâlâš nuorâi teivâdmeh láá ohtii ohhoost já ohjelmist láá ovdâmerkkân savâstâlmeh, sierah já ráámmátmáttááttâs. Teivâdmijn láá savâstâllâm ovdâmerkkân tast, et kolgâččij-uv máhđulâš kyeimi leđe meid oskoost.
Anarist Tervaniemi ahasiih nuorah iä ennuv tiettum kirhoost já sun hárjánij leđe áinoo nuorâ. Eromâš tábáhtusâi tego sämmilij kirkkopeeivij ohtâvuođâst peesâi teivâđ eres nuorâigijn.
Ristâosko lii lamaš Tervaniemi elimist suu pärnivuođâ rääjist. Osko lii suu eellim toorjâmuorâ já uáinoo suu piäiválii elimist maaŋgâ náál. Sun ruhâdâl jyehi peeivi aainâs-uv ohtii, lohá ráámmát já uásálist aktiivlávt kirholii elimân.
– Ulmuin kiäh oskoh, te lii taggaar jieijâslágán siärvuslâšvuotâ. Motomin oro, et tot ovtâstit ennuv já lii älkkeb puáttiđ oohtân talle, sun hundâruš.
Oskon láá kullum meid ohtuunisvuođâ tobdoh já ruossâlâsvuođah
Motomin Ruut Tervaniemi lii tubdâm ohtuunisvuođâ osko keežild. Nube tááhust sun meid lijkkoo leđe ohtuu, luuhâđ já jotteeđ meecist.
– Ij must lah kuássin lamaš taggaar tobdo, et liččim pááccám tondiet ulguubeln. Mut kale must lâi motomin ohtuunisvuotâ muu oskoost, ko jiem talle val máttám hirmâd ennuv sárnuđ tast iärásijgijn.
Luuhâm já kirjeh láá suu elimist tergâdis ääših. Motomin osko já mielâmield kirjálâšvuotâ láá tovâttâm ruossâlâš tobdoid. Sun lijkkoo eidu tääl luuhâđ dekkarijd já fantasia kiirjijd.
– Tot lii lamaš must oskoin taggaar koččâmuš, et lii-uvks tot ok vâi ij. Mut mun tiäđám, et tot lii fiktio, te talle tot ij lah muu mielâst hyeni.
Ulmuuh kuleh ain ucceeb já ucceeb evaŋgelis-luterilâš kiirkon já kirkko lii ennustâm, et meeri ucco val eenâb puátteevuođâst. Kirho siskáldâs hástun lii lamaš kavnâđ täsitiädu liberaal já konservatiivlâš áárvui kooskâst. Meid Tervaniemi mielâst lii motomin vaigâd uáiniđ kost rääji mana.
– Mii ep kuássin pyevti tiettiđ láá-uv mii jurduuh tast mii lii olmânáál, te loppâ loopâst nuuvt. Meiddei rámáttist lii ettum, et ulmuu pargo ij lah tuommiđ, mii lii olmânáál tâi puástud. Tain mun moonâm ovdâskulij.
Tuoivân lii varriđ maŋeláá maassâd Anarân
Ruut Tervaniemi lii luuhâm tääl oovtâ ive informaatiotutkâmuš já tot oro ain olmâ syergin sunjin. Suu niävdusin ličij porgâđ kirjeráájust puátteevuođâst.
Nuorâ tuoivân ličij puátteevuođâst varriđ maasâd Anarân, kaavpugân pääccim ij taan muddoost kiäsut suu.
– Mun ahevušâm muu perruu já Anarist orroo ustevijd já taggaar markkântobdo, mii lii ereslágán ko kaavpugist. Já stuorrâ ahheev lii meid luándu.
Yle Säämi Kesikyessi-rááiđu puáhtá kuldâliđ radiost jyehi vuossaargâ kesimáánu 22. peeivi rääjist porgemáánu pelimuudon já meiddei Yle Areenast.
