Roavvenjárggas boazoparlameanttas lei dán jagi temán boahttevuohta. Dan olis lei maiddái nuoraid boahttevuođapanela, gos nuorat besse muitalit, makkárin sii oidnet boazodoalu boahttevuođa.
Sáhka lei iešguđetlágan áitagiin, mat laktásedje ovdamearkka dihte eanangeavaheapmái. Panelaságastallama jođihii Viola Ukkola. Panelas lei ságastallamen maiddái Gárasávvonlaš Biret Julianna Hætta.
Váikko boazodoalus lea leamašan váttis jagit, de nuorat leat goittot positiivvalaččat. Sii háliidit bargat ja joatkit boazodoalus.
Hættai boazodoallu lea dehálaš, dat lea olles su eallin. Son maiddái vuoddjá herggiiguin ja lea nu olu mielde boazobargguin, go fal nagoda.
– Geahččalan vuolgit álo bearraša mielde vuoddjit go lea gárddis eallu. Mun háliidan leat stuorra doarjjan.
Hætta jáhkká, ahte son joatká boazodoalus. Son háliida maiddái boahttevuođas leat doarjjan iežas bearrašii. Boazodoalu boahttevuohta goit dahká várrugassan.
– Munnje lea boazodoallu olles váibmu, muhto álo lea stuorra ballu, mo geavvá juos de nohkáge muhtumin. Munnje lea hui dehálaš, ahte mii doallat ovttas gitta, das ahte boazodoallu bissu.
Nuorat háliidit leat mielde bálgosiid doaimmain
Nuorat besse maiddái cealkit dearvvuođaid vuorrasut boazodoallide. Sii sávve, ahte beasašedje leat eambo mielde bálgosa doaimman.
– Ahte nuoraide livččii eanet doarjja dan boazodoallui, muitala Hætta.
Hætta oaidná dehálažžan ráhkkanit maiddái dasa, juos boazodoallu ii bisttege ovdamearkka dihte váttis dálkkiid ja bahkka gesiid dihte.
– Gánnehivčče váldit nuppi skuvlejumi iige dušše luohttit, ahte boazodoalus manná buot bures.
