Miessemánu maŋimus vahkuloahpa ordnejuvvui Bådåddjos ”Dolvot”-lávllačállinleairra. Leaira lea deaivvadanbáiki nuorra musihkkáriidda ja buvttadeaddjiide.
Nuorra Sámi rap-artista Jesse Ruokolainen nappo Jezebro lei dán jagi vuosttas geardde dán leairras mielde. Son oaidná dan dehálaš deaivvadanbáikin artisttaid gaskkas.
– Dat lea mu mielas okta deháleamos áššiin dán áigge, ahte beassá hui álkit ovttas bargat. Ii leat streassa, das ahte sáhttágo jearrat geasnu, ahte sáhttego ovttasbarggu bargat.
Ođđa artisttaid lassin leairras ledje maid olu musihkkaindustriija veteránat. Mielde ledje oktiibuot 10 artistta ja vihtta buvttadeaddji.
Vuohččulaš Milla Pulska, Ravggon musihkkajoavkku solista, lei leairras mielde jo nuppi geardde. Songe oaččui ođđa jurdagiid iežas musihka ovddideapmái.
– Mun lean dakkár muttus iežan musihkain, ahte mun ozan veháš ođđa vugiid ja hámiid ráhkadit musihka, muitala Pulska.
Son anii árvvus, go juohke oassálastis leat iežaslágan oainnut ja go beassá eará vugiide oahpásmuvvat.
Leairra bohtosiin boahtá áibbas ođđa musihkka
Leairra áigge čállet golmma olbmo joavkkuin musihka. Jezebro áigu maiddái ovddidit leairras ráhkaduvvon musihka ovttas iežas joavkkuin. Ođđa musihkkabihttá sáhtášii boahtit olggos jo boahtte jagi álggus.
– Min joavku goittot mearridii, ahte dán ferte gárvvisin bargat. Eat guođe Bådåddjui dan bihtá.
Maiddái Pulska joavkkus šaddai bihttá, mainna sii áigot joatkit barggu.
– Mii gal leat hui duđavaččat dasa maid mii doppe ráhkadeimmet ja mis livččii gal miella almmustahttit dan.
Váikko musihka čálle unna joavkkus, de lei vejolaš gulahallat buot leairra oassálastiiguin.
– Doppe go hálešta ja oahpásmuvvá olbmuiguin, juos lea miella de sáhttá beare fitnat dadjamen, ahte livččii somá bargat duinna, muitala Ruokolainen
Jezebro sáhttá gullat boahttevuođas vel earáge sámeartisttaiguin ovttas. Son muitala, ahte oaččui olu oktavuođaid ja beasai máŋgasiiguin háleštit vejolaš ovttasbargguin.
Ruokolainen ozai leirii mielde vuosttas geardde guokte jagi dassái. Dan jagi ii lihkosmuvvan.
– Muhto dán jagi mun bessen. Lean hui ilus ja rámis, ahte bessen mielde.
Leairra lágidit Ella Marie Hætta Isaksen ja JM Norway.
