Dál Ruoŧa beale Gárasavvona Eurosuando parkerenbáiki lea vel guorus, muhto mihcamárain dat dievvá, go dán geasi ordnejit fas Gárasavvonis Gaskaijašurra-festivála.
Sáhka ii leat áibbas čielga sámefestiválas, muitala Nils-Jonas Ketola, guhte lea okta Gaskaijašurra-festivála ordnejeaddjiin. Doppe loaiddastit nu Suoma, Ruoŧa ja Sámi artisttat.
– Dat lei justa diet jurdda mis dalle: juohkehažžii vehá juoga. Mii leat dál dás Ruoŧa Gárasavvonis ja Suopma lea duos eanu nuppe bealde. Mii leat háliidan, ahte dohko boahtá juoga Suomas, Ruoŧas ja Sámis, čilge Ketola.
Ohcejogas seamma áigge festivála
Gaskaijašurra-festivála áigge deaivá ordnejuvvot maiddái Ohcejohka šearrá -festivála.
Dábálaččat Ohcejohka šearrá -festivála láve leat suoidnemánu álggu sulaid, muhto Sámiráđi 23. sámekonfereansa ja dasa gullevaš dáhpáhusaid dihte sii sirde festivála mihcamáraide, čilge ordnejeaddjiin Kaisa Tapiola.
– Dat lei sin doaivva, ahte min festivála livčče seamma áigge Sámekonfereanssain. Sii besset álkibun eahketdoaluid ordnemis, muitala Tapiola.
Ketola ii leat fuolas, ahte Sámis eai reahkkáše olbmot guktuid doaluide.
– Dathan lea buorre, ahte Sámis leat máŋggalágan, iežálágan doalut ja dakkárat mat čohkkejit olbmuid. Mun sávan, ahte juohke doaluide bohtet olbmot. Dat lea mu mielan fal buorre, ahte Sámis lea válljenmunni gosa háliida mannat gii nai, dadjá Ketola.
Tapiola lea ovtta oaivilis Ketolain.
– Mun jáhkán, ahte Gárasavvon lea nu guhkkin, ahte mis leat várra sierra guldaleaddjit. Eanaš min festiválagussiin bohtet lahkosis ja dán jagi maiddái doppe Sámiráđi konfereanssas.
Gárasavvonis áigot boahtte jagige doallat festivála mihcamárain.
Gieskat Suoma kulturruhtarádjosa Lappi ruhtarádju juolludii 16 500 euro Gaskaijašurra-kulturfestivála lágideapmái.
Ohcejogas eai máhte vel dadjat boahtte geasi festiválas.
– Mis ii leat fásta ruhtadeapmi. Dat lea áibbas das gitta, ahte oažžutgo mii ruhtadeami boahtte geassái. Ferte smiehttat, leago dat mihcamárvahkku buoret, vai dat mii leamaš ovdal, nappo suoidnemánu álgu, loahpaha Tapiola.
Divvojuvvon 9.6.2026 diibmu 9.20
Bajilčála rievdaduvvon. Álggos muitaleimmet, ahte Suoma sámeguovllus leat goit guokte festivála mihcamárain, muhto Gárasavvona Gaskaijašurra ordnejuvvo Ruoŧa beale Gárasavvonis.
