Sápmelaččaid duohtavuođa- ja soabadankommišuvnna komissárat leat bálkkašuvvon dieđualmmustahttima stáhtabálkkašumiin. Dieđualmmustahttima stáhtabálkkašumit leat riikka alimus dovddastus servvodatlaš mearkkašumis.
Komissárat ožžot dán bálkkašumi, go leat buktán ovdan sápmelaččaid lossa, historjjálaš vásáhusaid. Bálkkašumi ožžot komissárat bargoeallinprofessor ja riektediehtaga doavttir Hannele Pokka, hálddahusdiehtagiid magisttar Irja Jefremoff, earkebisma emeritus, teologiija doavttir Kari Mäkinen, universiteahttalektor emerita ja servodatdiehtagiid doavttir Anni-Siiri Länsman, ja boazo- ja ealáhusdoalli Heikki Paltto.
Bálkkašumi árvu lea 30 000 euro ja dan juogadit oažžuid gaskkas.
Dieđualmmustahttin stáhtabálkkašumi ákkastallamiin daddjo, ahte sápmelaččaid duohtavuođa- ja soabadankommišuvnna bargu lea earenomáš mávssolaš dieđu almmuheapmi, go leat buktán sápmelaččaid váttis vásáhusaid álmmolaš ságastallamii. Bargu lea lasihan servodatlaš ipmárdusa ja ovddida ságastallama.
Bálkkašumi oažžuid lea válljen oahpahus- ja kulturministeriija, ja geige dieđa- ja kulturministtar Mari-Leena Talvitie Oulus vuossárgga.
Komissára giitá sápmelaččaid
Komissára Ánne-Sire Länsman lea ilus bálkkašumis ja diehtá geaid ovddemužžan giitit bálkkašumi ovddas.
– Mu mielas dát bálkkašupmi lea giittus dieidda badjelaš 400 sápmelažžii, geat muitaledje iežaset vásáhusaid kommišuvdnii.
Länsman vuordá bálkkašumi buktit eanet oinnolašvuođa kommišuvnna bargui sápmelaččaid vásáhusaide.
– Dál go bálkkašupmi addojuvvui kommišuvdnii, sávan ahte dat ságastallan álggášii johtit vehá viidábut Suomas buotlágan servošiin, sihke priváhttaolbmuid dásis ja gitta stáhta dássái.
Kommišuvnna geigii loahpparaporttas juovlamánu álggus mannan jagi. Dál loahpparaporta ii vajálduva, go ožžo bálkkašumi, árvala Länsman.
– Dat lei dehálaš, ahte dat bođii dán muttus.
”Komissárat lihkostuvve váttis vuolggasajiin duddjot luohttámuša”
Komissáraid bargu lea gáibidan vuđolaš áššedovdámuša, árvvoštusa ja persovnnalaš čatnašuvvama. Almmustahttojuvvon diehtu dávista mearrádusaid dahkamii nugo maiddái ságastallamii ja kultuvrii.
Suoma stáhta lea huksejuvvon suopmelaččaid ja sápmelaččaid eatnamiidda, muhto sápmelaččaid muosáhusat lea báhcán priváhttan guhkes áigái. Doaibmi ja vuoiggalaš servodaga eaktun lea nákca deaividit historjámet bákčasiid.
Dát gáibida, ahte váttis ja gillámuša dagahan muosáhusat dahkkojuvvojit oinnolažžan ja gieđahallojuvvojit. Dušše ná sáhttá duddjot vuođu joatkkabargui ja servodatlaš vuigemii.
Duohtavuođa- ja soabadankommišuvnna bargu nanne dieđu bokte sámevuođa boahttevuođa duddjoma eavttuid Suomas. Komissárat lihkostuvve váttis vuolggasajiin duddjot luohttámuša, mii gulaskuddandilálašvuođaid bokte čoagganii historjjálaččat mearkkašahtti, divodeaddji ja viidát váikkuheaddji ollisvuohtan, muitalit bálkkašumi ákkastallamiin.
