Kuálásteijee Mikko Valle eidu te patârij, ko niŋálâs sorvâ volliittij suu oolâ Juvduu Jormokuoškâst.
– Sorvâ puátá oolâ! Sorvâ puátá oolâ pergâlâh! Valle čuárvui puhelimân iäččásis patârem kooskâst.
Valle lâi vuálgám iho šlivgođ stáágu kuoškân, ko suu eeči aalgij škorijdiđ kuálástemtuuváást.
Sun kuálástij kuoškâ vyelni, ko kuulâi stuučâ suulân muádlov meetter keččin. Juuvâ rasta kaalij sorvâ.
Smiettim, et tääl šadda fijnâ kove.
Mikko Valle
Someääigi olmožin Valle toppij puhelin já iiskâi videokuvviđ soorvâ. Vuosmuš irâttâs ij luhostum – puhelin vaaldij soorvâst kove ige video.
Ko Valle molsoi videokován, kuhás káállám sorvâ jorgettij maasâd riidon.
– Tot keejâi njuolgist munjin. Mun arvâlim, et tääl lii miinii epitáválâš. Taat juuhâ ij lah tuárvi styeres munnui kuohtuid, Valle muštâl.
Totkee: Tilálâšvuotâ lii hirmâd härvinâš
Juuvâst čuážžum sorvâ luoštij peljijdis vuálus, luoštij uáivis já aldanškuođij jotelávt Valle.
Luánduriggodâhkuávdáá eromâštotkee Juho Matala iätá, et sorvâ lâi čielgâsávt aggressiivlâš. Suu mielâst taggaar lii hirmâd härvinâš.
– Lii olâtteijee, et tot vuálgá volliittiđ. Táválávt soorvah viggeh patâriđ, jis toh kuáhtájeh uuhkijd, Matala muštâl.
Totkee arvâl, et soorvâ mielâst kuálásteijee lâi liijkás alda, te tot kalga kámppádâlškyettiđ.
– Jis ovdâmerkkân piäđuh uávutteh soorvâ, te kal tot viggá cogâdâttâđ.
Patârem miäcán ruotân
Valle kiergânij smiettâđ, et ličij-uv sun happiittâddâm njuškiđ kárbá paijeel já komettiđ tom syeijin jieijâs oolâ. Sun meridij kuittâg kaččâliđ miäcán.
– Idduuttem olmožin munhân ruottim taam vielti neljijn ruovjijn pajas. Mun vaarâ sulâstittim eenâb kuobžâ ko ulmuu, Valle muuštâš.
Vielti paajaabeln vyejettem eskin aalgij. Valle toolâi stáágus käŋŋirist já irâttij tain toollâđ kooskâ soorvân.
– Kuullim ko stággu kuoskâi soorvân. Kyelialmaah tietih, et ko stággu kuoskât mottoom ellei, te tom kal kulá, Valle iätá.
Sun kuulâi meid soorvâ tanccâm, ko tot tuáridij Valle ovdâjuolgijguin.
Totkee Matala mield Valle tooimâi olmânáál ko viigâi muorâi kooskân toorvon.
– Meendu kuhás lii tušše patâriđ, mut jis pasta moonnâđ kuusnii miestui tâi muorâi suáján, te tot sáttá išediđ. Sorvâhân uáiná viehâ hyeneest, et jis lah liihâdhánnáá muorâ tyehin, te tot ij veltihánnáá hoksáá, kuus moonnih, Matala rävvee.
Etisuáittu iäčán muorâ tyehin
Siksak jotkui kuhháá polsâttuvvâst. Valle huámášij, et sust lâi val kännyk kieđâst.
– Jis tot sorvâ fättee, kihheen ij tieđe kost lam.
Valle teddilij puhelimist vuosmuu symbool, mii muštottij ruánáá luuri. Sun luhostui suáittiđ WhatsAppijn iäččásis.
Eeči västidij jotelávt, mut tuáridem ain jotkui.
– Jiem smiettâm, et ”vyerdi sorvâ váhá, mun tedâččâlâm puhelin”.
Tile jotkui mottoom puudâ, ovdilgo Valle ooinij soorvâ majemuu keerdi.
Valle eeči lâi puáttám kááijuđ algees. Mieldi sun lâi váldám viärju – äijih puáris mieskâm meeli.
Eeči riemâi pääihi oolâ já sorvâ moonâi kiäinusis. Valle osko, et sorvâáldu halijdij suojâliđ vyesis, mii lâi máhđulávt teermi alne.
– Jis tobbeen ij lamaš vyesi, te talle jiem tieđe. Jiem kuittâg hettim, čuárvum tâi lihâdâm jotelávt, Valle muštâl.
Sortâvolliitmeh sättih leđe jiegâvarâliih
Totkee Juho Matala muštâl, et Suomâst ij lah tiäđust sorvâvolliitmeh, moin olmooš ličij jáámmám. Máhđuttem tot ij kuittâg lah.
Matala lii kuullâm tuše tábáhtuumeest, mast sorvâ lâi rohhááttâm ulmuu oovdeb täälvi Torniost.
– Ko tot ovdâkyepirijguin časka, te kal tast šadda ulmust jieggâ vyelgiđ. Tornio tábáhtuumeest koolgâi eelliđ tuovŋuumin pyecceiviäsust, Matala iätá.
Matala muštoot, et čohčuv kimeääigi sarves soorvah láá aggressiivliih.
Valle ij poolâ maccâđ Jormokuoškân. Kuoškâ lii sunjin tego nubbe päikki – peivi ovdilgo sun šoodâi, suu vaanhimeh eelijn tobbeen.
– Mun lam kuldâlâm jo čuávji siste taam kuoškâ váldálâš šuuvân. Jyehi keesi lam puáttám teehi, jis jiem kuálástiđ, te peri navdâšiđ luándust, Valle iätá.
Tääl sun lii kuittâg várugub.
– Majemustáá ko oinim tääbbin soorvâ, tot koorvij muu jo 50 meetter keččin. Kustoo ij karve innig. Tääl láá roolih mulsâšum, Valle paahud.
Valle mieđeet, et tábáhtume lâi uáli spiekâstâhlâš, mut lii tuárudâm luándu elleiguin ovdil-uv.
– Návt-uvks muu jieštobdo moonâi, et evviseh vyejetteh muu meecist ige nubij kulij. Majemuš vildâellee, mii lii rohhááttâm muu, lâi kozzsäplig, smiättá Valle.
