Mihcamárvahkus ealáska Ohcejoga girkosiida duođas, go Sámiráđđi ordne doppe iešguđetlágan dáhpáhusaid. Doppe dollet ovdamearkka dihte nuoraidkonferánssa Gávnnadeapmi 3:ža, KulturSápmi 2026 ja vel 23. Sámekonferánssa.
Sámiráđi váldočálli Áile Jávo muitala, ahte dán vahkus Ohcejogas bohtet leat badjelaš 300 dáhpáhusguossi.
– Ovdalgo ohcejohkalaččat healkkehit, de eai buot 300 olbmo leat oktanaga oba áigge. Muhtumat leat álgovahkus, dasto vulget ja de bohtet ođđa olbmot sadjái, čaimmiha Jávo.
Annukan grilli oamasteaddji Anna-Marja Nikkinen lea ráhkkanan vahkkui ja jiekŋabovssat leat nu dievva, ahte illá varra lohkkige bissu gitta.
Ieš áigu bargat iđidis gitta idjii, jus lea dárbu.
– Mii leat diŋgon lasi dávvirgurpmiid ja bálkáhan eanet bargiid, čilge Nikkinen.
Ohcejoga gilidálus fas leat uhccánaš ráhkkanan dáhpáhusvahkkui.
– Láibut vehá eanet ja nu, ahte visot lea dáppe ordnegis, dadjala Lávra Länsman.
Lea sivva manin justa Ohcejohkii háliidedje Sámiráđi doaluid
Sámiráđđi ávvuda, go leat doaibman 70 jagi ja danin leat olu dáhpáhusat miehtá vahku, muitala Sámiráđi váldočálli Áile Jávo.
Lea čielga sivva manin dáhpáhusaid lágidanbáikin válljejuvvui Ohcejohka.
– Midjiide lea hui somá boahtit Ohcejohkii, danin go Sámiráđis lei hui guhká váldočállingoddi Ohcejogas, muitala Jávo.
Oažžu boahtit fitnat, vaikko ii livččege almmuhan iežas
Vaikke máŋgga dáhpáhussii bivde almmuhit iežas ovddalgihtii, de liikká lea ain vejolašvuohta searvat, lohpida Jávo.
– Jus háliida fitnat, dat lea áibbas vejolaš dan dahkat, mii čálistat nama listui ja dat gal ordnašuvvá. Buresboahtin fal buohkaide, bovde son.
Vahku álggaha nuoraidkonferánsa Gávnnadeapmi 3, dat lea vuossárggas gitta duorastahkii. Doppe ordnejuvvo ovdamearkka dihte ”My dream Sápmi” -bargobadji, mas nuorat smihttet makkár boahttevuođa háliidit Sápmái.
Maŋŋebárgga Ohcejogas álgá KulturSápmi-dáhpáhus. Dan oktavuođas geigejit maiddái árbevirolaš Sámiráđi girjjálašvuođabálkkašumi.
Daid lassin lea velá duojáriid ja sámi fitnodagaid deaivvadeapmi maŋŋebárggas duorastahkii. Duodjemárkanatges leat gaskavahkus bearjadahkii.
Sámekonferánsa ordnejuvvo loahppavahkus, 18.–21. beaivve. Sámekonferánsa lea Sámiráđi bajimuš mearridanorgána. Daid leat lágidan jagi 1956 rájes.
Sámekonferánssain leat dahkan máŋggaid historjjálaš mearrádusaid, ovdamearkka dihte jagis 1986 mearridedje makkár sámeleavga galgá leat.
Mihcamárvahkkoloahpas lea maiddái Ohcejohka šearrá -festivála.
