Okta dain vuosttas Sámi populáramusihkkajoavkkuin, 70-vuođđologus álggahan Deatnogátte Nuorat máhccet duođas dán geasi konseartalávddiide. Sii ledje vuosttažiid joavkkus, geat ovttastahtte árbevirolaš luođi populáramusihkkii.
Deatnogátte Nuorat ieža illudit, go besset čuojahit vuot ovttas. Dain konsearttain sii čuojahit áinnas daid buohkaide oahpes, nu daddjon hittabihtáid.
– Agibeaivve leamaš nu, ahte olbmot háliidit gullat daid ovddeš lávlagiid ja luđiid. Jus ođđa lávlaga čuojahat, de fertejit olbmot hárjánit dasa vuos, boagusta joavkku lávlu ja juoigi Tore Aslaksen.
Deatnogátte Nuoraid maŋimuš konsearttas olles joavkkuin lei gollan jo guhkes áigi, ahte joavkku lahttu Irene Pettersen ii oba muittege, goas sii leat maŋimuš leamašan buohkat lávddi alde.
Dán giđa sin bovdejedje Ušlui čuojahit olles joavkkuin ja Pettersen fáhkkestaga háliidige vuolgit fárrui.
– Dát gánddathan leat johtán veaháš, muhto mun in leat leamašan mielde. Dál de roahkkasin fárrui, jurddašin ahte gal mun sáhtán goit geahččalit vaikke ledjen jo vuollánan lávlunhommáin.
Miella čuojahit ain
Giđđat Ušlus ordnejuvvon konsearta movttiidii olles joavkku joatkit čuojaheami dán gease.
– Dat manai nu bures, ahte measta gatnjalat bohtet čalbmái. Visti Ušlus lei dievva, olbmot doško gieđaid, njuiko mielde, govvejedje ja muhtumat čirro – dat lei nu erenomáš dovdu, čilge Aslaksen.
Sis lea dán geasi boahtemin ain jo golbma konseartta. Sii gorgŋot lávddi ala Beskán Luossa rockas Kárášjogas ja Vuonnamárkaniin Vuonnabađas.
Vuosttas konsearta lea jo dán lávvardaga Buolbmágis. Dainna konsearttain ávvudit sin badjel 50 jagi bálgá.
Miella livččii čuojahit eamboge, dadjá Aslaksen.
– Jus olbmot háliidit ja bovdejit, de mii dat gal boahtit. Mis leat olbmot eanáš jo ealáhagas, áigi gal lea, Tore Aslaksen cavgila.
Deatnogátte Nuorat beroštahttet iežas ahkebuolvva lassin maid nuorabuid, geat leat bajásšaddan sin musihkain.
– Lean ádden olbmuin, ahte leat ohcalan Deatnogátte Nuoraid. Ođđa sohkabuolva, geat leat dál 20–30 jagi boarrásat, eai leat vásihan dan ja háliidit oaidnit, lohká Irene Pettersen.
