Máŋgasat sáhttet leat luonddus jođedettiin fuomášan, ahte biktasiidda darvánit smávva ruoná divrrit. Eandalit juos sogiid siste vázzá. Dat smávva divrrit leat soahkeširrát.
Soahkeširrát leat dán jagi erenomáš olu Ohcejogas. Dan leat fuomášan sihke báikkálaččat ja dutkit. Geavu dutkanstašuvnna dutkanteknihkkár Tommi Andersson lohká soahkeširráid lassáneami sivvan leat goikkádagaid ja bahkka gesiid.
– Arvi lea daidda heittot, dasgo arvi sáhttá de gahčahit daid vulos ovssiin.
Váikko soahkeširrát leat álo leamašan maiddái Sámis ii leat Andersson oaidnán ovdal ná olu go dán geasi.
– Ammal leamašan jagit, go soahkeširrát leamašan eanet, muhto in muitte ahte Ohcejogas livčče leamašan ná olu soahkeširrát.
Maiddái Ohcejohkalaš Uhca Ovllá Ola, Ola Laiti lea fuomášan širráid.
– Go vázzán de oidnojit ja gahčadallet. Go savdnjila muora dat gahččet dego arvin.
Unnit soagit sáhttet goikat
Širrát eai leat olbmui váralaččat, muhto uhcit sogiid dat sáhttet njammat goikkisin. Stuorát muoraid šaddama širrát sáhttet hihtudit.
– Dat eai goit jáme širráid borramii, muitala Andersson.
Soahkeširrát leat goittot giksin maiddái olbmuide. Ola Laiti muitala, ahte dat čuvvot su juoba stohpui sisa ja čoahkkanit stohpolásaide.
– Eaihan dat bargga maidige, muhto leahan dat ilgat juos dat leat nu olu, lohká Laiti.
Andersson lea maiddái fuomášan, ahte jo giđđat leat soahkeurbbit dievva širráid maniid. Dat oaivvilda dan, ahte širrát ellet dálvvi badjel Sámis.
Dutki jáhkká, ahte juos liegga geasit joatkašuvvet, de maiddái širráid mearri bissu stuorisin. Širrát gerget geasi áigges maiddái lassánit máŋgii.
– Dathan lassánit geassit nu, ahte sáhttet leat máŋga buolvva ovtta geasis. Juos lea liekkas de širrát šaddet giksa ahkái sullii vahkus.
