Sämikulttuurkuávdáš Sajosist juhleh 25. kesimáánu tijme 17.00 150-ihásii Aanaar kieldâ. Ohjelmist lii maaŋgâlágán sistuálu. Juuhlijn lii muusik- já čaittâlemoovdânpyehtimeh.
Tuáluid puáhtá čuávvuđ káidusin Yle Areenast:
Juhletilálâšvuođâst almostiteh meid uđđâ historjákirje Aanaar historjást. Jaakko Peltomaa já emeritusprofessor Veli-Pekka Lehtola kirje Ihmisten Inari – kohtaamisten maa lii jotkâ ive 2003 almostum Inari - Aanaar -nommâsâš kirje.
Lehtola uási kirjeest kieđâvuš ääigi soođij maŋa kidâ 70-lovo loopân. Peltomaa uási lii čaallum sahhiittâlmij vuáđuld majemuu 50 ive tábáhtuumijn.
– Tast láá veikkâ mon ennuv ulmui muštâlusah sii pärnivuođâst já tain aaigijn. Lasseen muu uásist Irja Jefremoff čaalij nuorttâlij historjá pirrâ. Jaakko sahhiittâlmijn láá ennuv anarâšâi muštâlusah, Lehtola muštâl uđđâ kirjeest.
Aanaar kieldâ vuáđudui 25. kesimáánu 1876, ko Aanaar já Ucjuuvâ kieldah juáhásáin jieijâs kieldáid.
